АНУ-ын хотуудын 90 орчим хувьд борооны давтамж, хур тунадасны хэмжээ сүүлийн 50 жилд эрс нэмэгдсэн талаар судалгаагаар тогтоожээ.

Climate Central, Axios зэрэг байгууллагын мэдээлснээр 1970-2024 оны хооронд АНУ-ын 144 томоохон хотын 126-д нь цаг тутамд орох борооны хэмжээ дунджаар 15 хувиар өссөн байна. Зарим хотод энэ өсөлт 30-38 хувьд хүрч, хүчтэй аадар бороо, түргэн үерийн эрсдэл нэмэгдэж байгаа аж.

Үүний гол шалтгаан нь:

• Уур амьсгалын дулаарал, агаарын чийгшил нэмэгдсэн
• Хотжилт, “дулаан арал” үүсэх үзэгдлээс үүдэн үүл үүсэх, бороо орох нөхцөл бүрдэж буйтай холбоотой гэж мэргэжилтнүүд тайлбарлаж байна.

Жишээлбэл:

• Нью-Йорк хотод нэг цагийн дотор 50 мм-ээс дээш хур тунадас орох тохиолдол өмнөхөөс 2-3 дахин нэмэгдсэн.
• Индианаполис хотод 1970 оноос хойш борооны эрчим 14.6 хувиар өссөн.
• Калифорни мужид “атмосферийн гол мөрөн” гэж нэрлэгдэх их хэмжээний чийг тээвэрлэгч давхарга улам бүр идэвхжиж, хүчтэй бороо дагуулж байна.

Энэ нь үерийн эрсдлийг нэмэгдүүлж, хотуудын ус зайлуулах системд ачаалал өгч байгаа тул хотууд үерээс хамгаалах арга хэмжээ, ус зайлуулах дэд бүтцээ шинэчлэх шаардлагатайг мэргэжилтнүүд онцолжээ.