Тайланд 2022 онд өвс буюу каннабисын хэрэглээг зөвшөөрсөн Азийн анхны улс болсон нь аялал жуулчлал, газар тариалангийн салбарыг хөгжүүлж, олон мянган дэлгүүрийг бий болгосон.

Гэвч зохицуулалт дутуу хийгдсэнээр хүүхдүүд хэрэглэх боломжтой болж, донтох шалтгаан болсон гэсэн мэдэгдлийн улмаас олон нийтийн эсэргүүцэлтэй тулгарсан.

Эрүүл мэндийн сайд Сомсак Тепсутин дэлгүүрүүдэд каннабисыг эмийн жоргүйгээр худалдаалахыг хориглосон тушаалд гарын үсэг зуржээ. Түүнчлэн каннабис нь хяналттай өвслөг ургамал гэж дахин ангилахыг эрмэлзэх болсон.

Эрх баригч Феу Тай нам өмнө нь каннабисийн хэрэглээг дахин гэмт хэрэгт тооцохыг оролдсон ч эвслийн засгийн газрын хуучин хамтрагч Бхумжайтай намын хүчтэй эсэргүүцэлтэй тулгарсан.

Ерөнхий сайд Паетонгтарн Чинаватра болон Камбожийн удирдагч асан Хун Сен нарын утсаар ярьсан яриа алдагдсаны улмаас Бхумжайтай нам өнгөрсөн долоо хоногт эвслээсээ гарсан юм.

Албаныхан өнгөрсөн сард жуулчдад холбогдох каннабис хууль бусаар хил нэвтрүүлэх гэмт хэрэг сүүлийн саруудад ихэссэнийг мэдэгдсэн.

Мансууруулах бодистой тэмцэх газрын ерөнхий нарийн бичгийн дарга Фанурат Лукбүүн хэлэхдээ судалгаагаар каннабисыг хуулиар хүлээн зөвшөөрсний дараа донтсон хүмүүсийн тоо мэдэгдэхүйц нэмэгдсэн болохыг тогтоожээ.

Засгийн газрын хэвлэлийн төлөөлөгч Жираю Хунгсаб Эрүүл мэндийн яаманд каннабис худалдаалах хяналтыг чангатгахыг тушаасан, учир нь "хэрэглээний болон эмчилгээний зориулалтаар каннабис зардаг олон дэлгүүр нээгдэж, хүүхэд болон энгийн хүмүүст хялбар олж авах боломжийг олгосон нь хар тамхитай тэмцэх засгийн газрын зорилготой зөрчилдөж байна" гэжээ.

Каннабисын хэрэглээг дэмжигч бүлэг журамд өөрчлөлт оруулсан нь улс төрийн зорилготой гэж мэдэгдсэн байна.

Тус бүлэг каннабис хэрэглэх, борлуулахыг дахин эрүүгийн гэмт хэрэг болгох оролдлогыг эсэргүүцэж, ирэх сард Эрүүл мэндийн яаманд цуглана гэжээ.