Хилийн маргаантай улсын удирдагч асантай дотночлон ярьсан Тайландын ерөнхий сайд уучлалт гуйв Тайландын ерөнхий сайд Пэйтонгтарн Шинаватра Камбожийн удирдагч асан Хун Сентэй хийсэн утасны яриа ил болж ард түмнийхээ дургүйцэлтэй нүүр тулан засгийн газар нь хямралд хүрснээр уучлалт гуйжээ. Ил болсон ярианд өмнө нь ерөнхий сайд байсан Таксин Шинаватрагийн охин одоогийн ерөнхий сайд Пейтонгтарн нь Хун Сентэй хоёр улсын хилийн маргааны талаар ярьсан. Ил болсон дуу бичлэгт Тайландын зэвсэгт хүчний өндөр албан тушаалтныг “зүгээр л чанга харагдахыг хүссэн” гэж шүүмжлээд зогсохгүй Камбожийн экс удирдагчийг “ахаа” гэж дуудсан байна. Мөн хэрвээ хүссэн зүйл байвал “хэлэхэд л болно, би зохицуулна” гэжээ.

Өчигдөр хийсэн хэвлэлийн хурлын үеэр Пейтонгтарн “миний бие Камбожийн удирдагчтай хийсэн утасны дуудлагын ил болсон дуу бичлэг олон нийтийн дургүйцлийг төрүүлсэнд хүлцэл өчмөөр байна” гэжээ. Камбожийг 40 шахам жил удирдсан Хун Сенийг 2023 онд түүний хүү, одоогийн ерөнхий сайд Хун Манет залгамжлах болсон ч улс төрийн хувьд нөлөөтэй хэвээр байна. Паетонгтарн өөрийнхөө нь яриаг “хэлэлцээрийн тактик” байсан гэсэн ч  олон нийтийн дургүйцлийг дарахад төдийлөн нөлөөлсөнгүй. Тайландын гадаад хэргийн яам өнгөрсөн пүрэв гарагт Камбожийн Элчин сайдыг дуудаж дуудлага алдагдсантай холбогдуулан эсэргүүцлийн захидал хүргүүлсэн байна. Анх ярианы нэг хэсгийг агуулсан дуу бичлэг цацагдсаны дараа бүрэн хувилбарыг нь Хун Сен ил болгожээ. Утасны дуудлага нь Паетонгтарны засгийн газрыг эмх замбараагүй байдалд оруулсан байна. Эвслийн хоёр дахь том нам болох консерватив Бхумжайтай нам эрх баригч эвслээс гарснаар түүний засгийн газар ганхаж эхэлсэн.

 Чарттайпаттана,  Нэгдсэн Тайланд Үндэстний нам болон Ардчилсан намуудын удирдагчид пүрэв гарагийн үдээс хойш хямралын талаар яаралтай хурал хийсэн ч эвслээс гарсангүй. Хэрэв өөр нэг эвслийн хамтрагч гарвал түүний байр суурийг бататгахын аргагүй болгож шинээр сонгууль явуулах эсвэл бусад намууд шинэ эвсэл байгуулах оролдлого хийх магадлалтай. Сөрөг хүчний Ардын намын дарга Наттафонг Руенгпаньявут цэргийн эргэлт хийхээс сэрэмжлүүлж, бүлэглэлүүд нөхцөл байдлыг ашиглаж, "ардчилалд хор хөнөөл учруулж болзошгүй үйл явдлыг өдөөх"-ээс сэргийлэхийн тулд Паетонгтарныг парламентыг тараахыг уриалсан.

Тайландын засгийн газар 1932 онд үнэмлэхүй хаант засаглал дууссанаас хойш арваад удаа төрийн эргэлт хийж, сүүлийн хорин жилийн турш тус улсын улс төрд цэрэг арми болон Паэтонгтарны гэр бүл болох Шинаватра нарын хооронд эрх мэдлийн төлөөх тэмцэл ноёрхож ирсэн. Пэйтонгтарн Шинаватрагийн эцэг Таксин Шинаватра 2006 онд төрийн эргэлт хийж, авга эгч Йинглак нь 2014 онд төрийн эргэлт хийснээр шүүхийн шийдвэрээр албан тушаалаас нь огцруулсан юм. Засгийн газрын эсрэг хэдэн зуун жагсагчид, тэдний зарим нь 2000-аад оны сүүлчээр аавынх нь эсрэг "Шар цамц" хөдөлгөөнд оролцож байсан хүмүүс Паетонгтарныг огцрохыг шаардаж төрийн ордныхоо гадна жагсаж байна