Япон улсад 2025 оны зун дотоодын будааны үнэ огцом өсөж, зах зээлд нийлүүлэлтийн хомсдол бий болоод байна. Олон улсын хэвлэлүүдийн мэдээлснээр, тавдугаар сарын байдлаар будааны үнэ өнгөрсөн оны мөн үетэй харьцуулахад 101.7 хувиар өссөн үзүүлэлттэй гарчээ.

Тус улсын хүнсний салбарт урьд өмнө тохиож байгаагүй энэхүү үнийн хөөрөгдөлд дараах шалтгаанууд нөлөөлсөн байна. Үүнд:

• 2023 оны хэт халалт,

• 2024 оны газар хөдлөлтөөс үүдэлтэй ургацын алдагдал,

• Олон нийтийн нөөцлөлт, хэрэгцээний огцом өсөлт багтжээ.

Индонез, Вьетнам зэрэг орнуудаас импортлох будааны хэмжээ нэмэгдэж байгаа ч Японы уламжлалт дотоод зах зээл импортын будаа хүлээн авахад хойрго хандсаар байна. Харин сүүлийн долоо хоногуудад үнэ бага зэрэг буурч эхэлсэн ч зах зээлд тогтворжилт хараахан ажиглагдахгүй байна.

Будааны жижиглэнгийн үнэ одоогоор Токиогийн томоохон сүлжээ дэлгүүрүүдэд 5 кг нь 4200 иен буюу ойролцоогоор 30 ам.долларт хүрээд байна. Харин Засгийн газрын тогтоосон дундаж ханш нь 2000 иен орчим байв.

Зарим сургуулиуд цайны цээндээ будаатай хоол багасгах, ресторанууд үнэ нэмэх зэрэг арга хэмжээ авч эхэлжээ. Засгийн газар стратегийн нөөцөөс будаа гаргах шийдвэр гаргасан ч нөхцөл байдал бүрэн тогтворжих хүртэл хугацаа шаардлагатай гэж үзэж байна.