Дэлхийн хамгийн олон дагагчтай TikTok од Хаби Ламе АНУ-ын дүрмийн дагуу албадан гарсан талаар мэдээлэл гарлаа.

АНУ-ын Иммиграцийн алба (ICE) 2025 оны зургаадугаар сарын 6-ны өдөр Лас Вегасын нисэх онгоцны буудал дээр Хаби Ламег визээ сунгуулаагүй хэмээн буруутган, “voluntary departure” буюу өөрийн хүсэлтээр АНУ-ыг орхих шийдвэр гаргасан байна.

Хаби Ламе 4-р сард АНУ-д орж, Met Gala зэрэг томоохон үйл явдалд оролцсон бөгөөд түүний визийн асуудал үүнээс хойш үүссэн аж. АНУ-ын зарим нөлөө бүхий “influencer”-үүдийн нэг, Pro-Trump үзэлтэй Bo Loudon нь Хаби Ламег ICE-д мэдээлснээ олон нийтийн өмнө зарласан ба энэ нь олны шүүмжлэл дагуулжээ.

Иммиграцийн албаас мэдэгдсэнээр, Хаби Ламе АНУ-ыг албадан гарсан биш, дүрмийн дагуу өөрийн хүсэлтээр орхисон бөгөөд ирээдүйд АНУ-д орж ирэхэд нь саад болохгүй гэдгийг онцолсон байна.