Жилийн онцлох одон орны үзэгдлийн нэг болох “Гүзээлзгэнэ сар” энэ долоо хоногт буюу 6-р сарын 11-ний өдөр бүтэн төлөвтөө хүрэх гэж байна. Гэхдээ сонирхолтой нь, энэ үзэсгэлэнт сар өнөө орой ч тэнгэрт маш тод гэрэлтэн харагдах тул одон орны сонирхогчдын хувьд шөнөжингөө харж ч болох онцгой өдөр болох юм. 

 “Гүзээлзгэнэ сар”-ны тухайд, 

“Strawberry Moon” буюу “Гүзээлзгэнэ сар” хэмээх нэр нь Хойд Америкийн уугуул индианчуудын уламжлалаас үүдэлтэй бөгөөд 6-р сар бол зэрлэг гүзээлзгэнэ хурааж эхэлдэг улирал байсан тул ийн нэрлэгдэж иржээ. Энэхүү бүтэн сарны нэр нь сарны өнгөтэй холбоогүй ч зарим үед намхан гардаг учир алтлаг, улбар туяатай харагддаг.

Энэ жилийн онцлог

2025 оны “Гүзээлзгэнэ сар” нь 18.6 жилийн мөчлөгт тохиодог сарны хамгийн намхан мандалттай давхцаж байна. Энэ нь сар тэнгэрт бусад бүтэн сараас илүү доогуур гарч ирэх бөгөөд энэ үед сарны гэрэл агаар мандлын шүүлтүүрээр өнгө хувирч шар, улбар шар, алтлаг туяатай болдог.

Хэзээ, хэрхэн ажиглах вэ?

• Бүтэн төлөвийн оргил цаг: 2025.06.11-ний 12:44 PM (Монголын цагаар)

• Сарыг харахад тохиромжтой цаг: Өнөө орой буюу 6-р сарын 10-ны оройноос эхлэн шөнө дунд хүртэл

• Хамгийн сайн харагдах бүс: Хотын гэрлээс хол, илүү тунгалаг тэнгэртэй газар

• Тусгай тоног төхөөрөмж шаардлагагүй, нүдээр болон гар утасны камераар ч харж болно

Монголчууд эрт дээр үеэс сар, тэнгэрийн хөдөлгөөнд онцгой ач холбогдол өгдөг байсан. Харин орчин үед сарны ийм гоо сайхныг олон нийтийн сүлжээгээр хуваалцах нь түгээмэл болжээ. Та ч бас өнөө орой тэнгэр өөд хараад зураг дарах, эсвэл хайртай хүмүүстэйгээ хамт сарны дор алхаж, амралтаа тухлан өнгөрүүлэхийг зөвлөж байна.