“Ихрүүдийн ерөнхийлөгч Трамп” нэртэй кантон дуурийн тоглолт өчигдөр шөнө БНХАУ, АНУ-ын удирдагч нар утсаар ярьсантай давхцан суудал нь дүүрсэн танхимд тоглогдлоо. Залуухан үзэгчдийн дунд уламжлалт хэв маягийг эвдсэн шинэ салхи хэмээн сайшаагджээ. АНУ-ын ерөнхийлөгч Доналд Трампаас сэдэвлэсэн 3 цаг 30 минут үргэлжлэх тус дуурь Шичүй театрт тоглогдож байгаа юм байна.

Кантон дуурь гэдэг нь Хятадын дуу, жүжиг, тулааны үзүүлбэр хосолсон хэдэн зууны түүхтэй урлагийн нэг төрөл аж. Онцгой үеүдэд тоглогддог уламжлалтай. Фенг шүйгийн багш хийж байгаад кантон дуурийн зохиолч болсон Эдвард Ли зохиолыг нь бичиж 2019 онд анх тоглуулсан. Анх тоглогдсоноосоо хойш зохиолыг цаг үеийн үйл явдлуудаар баяжуулж олон удаа өөрчилсөн. Лигийн хамгийн сүүлд тавьсан жүжигт Трампын охин Иванка аавынхаа төөрсөн ихэр Чуан Пу нь Хятадад амьдарч байгааг зүүдэлж буй үзэгдлээр эхэлнэ. Ерөнхийлөгч Трампыг Ангараг гаригаас ирсэн харийнхан олзолсноор Иванка Трампыг орлож жүжиглэж өгөхийг Чуанаас гуйна.

 Өөр нэгэн үзэгдэлд Трамп Зеленскийтэй хувцаснаас нь болж Цагаан ордонд маргалдаж Хятадын онлайн худалдааны сайт Таобаогаас авсан усан буугаар буудаж буй хэсэг гарна. Кантон дуурийн жүжигчин Лунг Кун-тин Трампын дүрд тоглосон. “Бид Хятад хүмүүс харин тэр бол Америк хүн гэхдээ хамтын нөхөрлөл мөнхөд байх ёстой. Тийм ч учраас 2 улсын найрамдалт харилцааны тухай бид тоглолтдоо тусгаж өгсөн” Үзэгчид тоглолтын туршид инээдээр тасраагүй бөгөөд төгсгөлд нь сэтгэл хөдлөн талархал илэрхийлж байлаа.