Кёнг Хи их сургууль өнгөрсөн тавдугаар сарын 28-нд ойрхон амьдардаг 90 гаруй настай нэрээ нууцалсан хатагтай төв байранд нь зочилж 50 сая воныг санхүүгийн бололцоо муутай оюутнуудад зориулан хандивласан тухай мэдэгджээ.

 Өндөр настай хандивлагч сонины цаасанд нямбайлан ороосон 50,000 воны дэвсгэртүүдийг их сургуулийн ажилтнуудад гардуулжээ. “Надад өөрт минь суралцах боломж олдоогүй юм. Гэхдээ өнөө цагийн оюутнуудыг тэр тусмаа санхүүгийн хүндрэлтэй хүүхдүүдийг боловсролоо үргэлжлүүлээсэй гэж хүссэн” хэмээн хандивлагч хэлжээ. “Дахиад цаг хугацаа байсан бол би илүү ихийг хуримтлуулах байлаа. Наснаасаа болоод бэлдсэн боломжоороо хандивлаж байна” гэж нэмж хэлсэн байна. Настан нь Кёнг Хи их сургуулийн төгсөгч биш, үр хүүхдүүд нь ч ямар нэг холбоо хамаарал байхгүйг мэдэгджээ. Хандиваа тус сургуульд өгөх шалтгаан нь институтэд итгэх итгэл байсан аж.

Настан Дүндэмүн дүүрэгт амьдардаг бөгөөд зураг авхуулах, арга хэмжээнд оролцох, ямар нэгэн бэлэг сэлт авахаас татгалзсан байна. Хандивлагчийн хүсэлтийг хүндэлж Кёнг Хи их сургууль 50 сая воныг санхүүгийн хүндрэлтэй байгаа оюутнуудад тэтгэлэг олгоход зарцуулахаа мэдэгдэв. Их сургуулийн төлөөлөгч: “Энэ бол энгийн нэг өгөөмөр хандив биш. Харин дараагийн үедээ боловсрол олох боломж өгөхийг чин сэтгэлээсээ хүссэн сэтгэлийн илэрхийлэл юм. Бид хандив өгсөн настны хүсэлтийг хүндэтгэж оюутнуудыг дэмжихэд хандивын хөрөнгийг зарцуулах болно” гэжээ.

Энэ үйлдэл нь нэр хүндээ өсгөх, хэвлэлийн анхааралд өртөхийн тулд сайн үйлс хийдэг болчихсон энэ үед алдар хүнд, боловсрол үгүй ч гэлээ чимээгүй сайхан сэтгэлийн хүч бусад хүмүүсийн амьдралд ямар том нөлөө үзүүлж чадахыг харууллаа.