Өмнөд Солонгосын ерөнхийлөгчийн сонгууль үдээс хойших байдлаар 71 %-ийн ирцтэй байна Өмнөд Солонгосын Сонгуулийн Хорооны гаргасан мэдээллийн дагуу сонгогчдын ирц орон нутгийн цагаар 16:00 цагийн үед 71%-д хүрчээ. Санал хураалт 20:00 цагт дуусах юм байна.

БНСУ-д үндэсний хэмжээнд 44.4 сая сонгуулийн насны иргэд байдаг. 2022 оны өмнөх ерөнхийлөгчийн сонгуулиар нийт ирц 77%-д хүрч байжээ. БНСУ нь хамгийн хурдан хүргэлтийн үйлчилгээг үзүүлдэг. Баяр ёслол, байгалийн онц аюултай үзэгдэл зэрэгт хүргэлт тасардаггүй гэх бөгөөд шөнө дунд захиалсан бараа үүрээр хүргэгддэг аж. Ийм хурдан шуурхай үйлчилгээг үзүүлэхийн тулд амралтгүй ажилладаг хүргэлтийн ажилчид энэ жил сонгуулийн санал хураах өдөр амарч байгаа юм байна.

Өмнөд Солонгосын залуучууд “#ivoted" гэх хөдөлгөөн өрнүүлж өөрсдийн гараар дуртай зохиомол дүрүүдийг оруулж бүтээсэн “баталгааны хуудас” хийцгээсэн байна. Хуруун дээрээ тэмдэглэгээ хийлгэхийн оронд өөрийгөө илтгэх баталгааны хуудсан дээрээ тэмдэглүүлж байгаа нь залуучуудын улс төрийн оролцоог нэмэгдүүлж байна. Өнгөрсөн 12 сард Юн Сук Ёл ерөнхийлөгч онц байдал зарласан хямрал одоог хүртэл үргэлжилж байна.

Сүүлийн 6 сар орчим хугацаанд БНСУ-ын улс төр тогтворгүйжсэн бөгөөд энэ удаагийн сонгууль нөхцөл байдлыг тогтвортой аюулгүй болгох боломж гэж ард иргэд нь үзэж байгаа. Сонгох эрхээ алдах шахсан Солонгосчууд энэ удаагийн сонгуулийн ач холбогдлыг маш сайн ойлгоцгоожээ. 28 настай дата инженер “Миний сонголт бол эрх мэдлийн нэг хэсэг, Бид өөрсдийн ардчиллыг аварч илүү сайжруулах хүчтэй гэж найдаж байна” хэмээн яриа өгсөн байна.