“Миний харсан ирээдүй” зөгнөлт манганы зохиолч Рёо Тацуки 2025 оны долоодугаар сард томхон хэмжээний цунами болно гэж зөгнөж бичсэн нь дэлхий дахиныг цочроож байна.

“Шинэ Ванга эмээ” хочтой Японы манга уран бүтээлч гамшиг усан доорх галт уул дэлбэрснээр нүүрлэж эхэлнэ гэж бичжээ. “2025 оны долоодугаар сард Японы өмнөд хэсгийн тэнгис далай буцална” гэсэн мөр олны анхаарлыг татаж бодит үр дагаврыг үзүүлж эхлээд байна.

Тацуки бол энгийн нэгэн уран бүтээлч биш. 1999 онд “Миний харсан ирээдүй” мангагаа хэвлүүлснээр ирээдүйд болох гамшгийг зурагт номын хуудсанд буулгадаг гэсэн нэр хүндийг бүтээгээд байна. Тус ном 2011 оныг хүртэл тийм ч их хүнд хүрээгүй ч түүний зөгнөлийн дагуу 2011 онд Тохокуд газар хөдлөлт болон цунами болсноор анзаарагдаж эхэлсэн. Тухайн гамшиг 18,000 хүний амь насыг авч одсон Фукушимагийн АЦС-ын дэлбэрэлтэд хүргэсэн байна. Түүний эхэн үеийн бүтээлүүд 1995 оны Кобегийн газар хөдлөлт бүүр Ковид-19 цар тахлыг ч зөгнөж байсан удаатай. Мөн Тацуки Фредди Меркури, Диана гүнж зэрэг олны танилуудын үхлийг зөгнөсөн.

Өөрийнх нь манга Хятад хэлнээ орчуулагдсан төдийгүй 900,000 хувь борлогджээ. Эдгээр зөгнөлүүд биелсэн байдлаар нь Тацукиг Болгарийн зөнч Вангатай адилтгах болсон. Тацукигийн манганы зөгнөл Японы аялал жуулчлалд нөлөөлж эхэлсэн байна. Тухайлбал энэ тухай интернэтээр шуугьж эхэлснээс хойш Япон руу хийх нислэгүүдээ хүмүүс цуцалж эхэлжээ. Хонг Конгд төвтэй аяллын WWPKG агентлагаас япон руу хийх аяллын захиалга 50% буурсан тухай CNN-д мэдээлсэн байна. Ирэх 2 сарын турш аяллын захиалга улам буурах төлөвтэй байгаа аж.

Өнгөрсөн дөрөвдүгээр сард Япон дахь БНХАУ-ын ЭСЯ хятад иргэдийг “боломжит байгалийн гамшиг”-т сэрэмжтэй байхыг анхааруулсан зөвлөмж гаргасан байна. Тус анхааруулгад Тацукигийн нэрийг дурдаагүй ч 7 сарын талаарх зөгнөлд хүмүүсийн анхаарал зовниж эхэлсэн үетэй цаг хугацааны хувьд таарч байгаа юм.

The South China Morning Post анхааруулга нь Японы эрэг дагуу газар хөдлөлт ажиглагдсан явдалд суурилсан гэж мэдээлсэн. Японы албан тушаалтнууд харин энэ асуудалд өөрөөр хандаж байна. Японы Цаг Уурын хүрээлэнгээс 2025 оны 7 сартай холбоотой ямар нэгэн анхааруулга гаргаагүй байна. Албаныхан Япон улс газар хөдлөлтөд өртөмтгий ч “Тацукигийн хэлсэн зүйлд ямар ч шинжлэх ухааны үндэслэл” байхгүй гэж үзэж байна.