Тавдугаар сарын 21-ний үдээс хойш Япон улсын ерөнхий сайд Ишиба Шигэрү хуучин Байгаль Орчны яамны сайд байсан Койзүми Шинжиротой уулзаж ХАА, Ой, Загас агнуурын шинэ сайдаар томилох талаар зөвлөлдсөн байна. Ерөнхий сайдтайгаа уулзсаны дараа Койзүми сэтгүүлчдэд “Хэцүү цаг үетэй бид нүүр тулж байна. Ард түмний ахуй амьдралд хамгийн их санаа зовоож буй будааны үнийн өсөлтөд яаралтай арга хэмжээ авахын тулд би чадах бүхнээ хийнэ. Энэ асуудалтай би өөрийгөө будаа хариуцсан сайд мэт сэтгэж тэмцмээр байна” хэмээн мэдэгдсэн.

Өмнөх сайд Это Таку будааны талаар зохисгүй хошигносон нь олон нийтийн дургүйцлийг хүргэж 21-ний өглөө огцрох өргөдөлөө өгөхөд хүргэсэн юм. Тэрбээр 2001-2006 онд ерөнхий сайдын алба хашиж байсан Койзүми Жүничирогийн 2 дахь хүү бөгөөд ах Койзүми Котаро нь жүжигчин юм байна.