Өнгөрсөн ням гарагт Японы эрх баригч Либерал ардчилсан намын хандивын арга хэмжээний үеэр Хөдөө аж ахуй, загас агнуурын сайд Это Такугийн хэлсэн зохисгүй хошигнол олон нийтийн хүчтэй эсэргүүцэлтэй тулгарсан. Тэрбээр "цагаан будаа худалдаж авдаггүй, гэр бүлд нь их хэмжээний будаа бэлэглэдэг учраас зарах цаг болсон" хэмээн хошигносон нь хүнсний гол нэрийн бүтээгдэхүүний үнийн өсөлтөд сэтгэл дундуур байгаа иргэдийн дургүйцлийг төрүүлжээ. Сөрөг хүчнийхэн болон ерөнхий сайд Ишиба Шигэрү түүний үйлдлийг хурцаар шүүмжилсэн. Тэгвэл Это Таку өнөөдөр /2025.05.21/ 08.00 цагийн орчим Ерөнхий сайд Ишибатай уулзаж, огцрох өргөдлөө өгсөн байна.

Японд стратегийн хүнсэнд тооцогддог цагаан будааны үнийн өсөлт сүүлийн нэг жилийн дотор 50 жилд байгаагүй дүнгээр өсөж, инфляц ихсэхэд гол түлхэц үзүүлж байна. Тухайлбал, 5 кг-ийн савлагаатай будааны дундаж үнэ 4220 иен буюу 29 ам.долларын үнэтэй байна.