“Хүүгийнх нь сүйт бүсгүй шанелийн цүнхээр гангарснаар Монгол улсын ерөнхий сайд хүндхэн нөхцөлд оров”  гэсэн гарчигтай мэдээ Японы Asahi Shimbun өдөр тутмын хэвлэлд гарсан байна. Асахи Шимбун нь 1879 онд сууриа тавьсан. Япон төдийгүй Азидаа хамгийн олон жил үйл ажиллагаа явуулж буй томоохон хэвлэлүүдийн нэг ажээ. Тус мэдээллийг бүрэн эхээр нь орчуулан хүргэе.

Монгол улсын ерөнхий сайд Л.Оюун-Эрдэнийн хүү болон хүүгийнх нь сүйт бүсгүй өөрсдийн тансаг амьдралын хэв маягаа нийгмийн сүлжээнд нийтэлсэн нь шүүмжлэл дагуулж байна. Хээл хахуультай тэмцэх бодлого баримтална хэмээн олон нийтэд зарлаж цэвэр шударга төрийн төлөөлөл мэт дүр төрхөөр суртал хийдэг тул олон нийт бухимдаж байгаа төдийгүй албаныхан хүүгийнх нь хөрөнгөнд мөрдлөгө эхлүүлжээ. Монголын мэдээллийн сайт Sonin.mn болон бусад эх сурвалжуудад мэдээлснээр нийслэл Улаанбаатар хотын төв Сүхбаатарын талбайд 14-нээс эхлэн эсэргүүцлийн жагсаал болж буй гэнэ. Маш олон залуучууд гар цүнх барин ерөнхий сайдыг огцрохыг шаардан жагсаалд оролцож байна. 16-ны өдрийн өглөө түүнийг огцрохыг шаардсан өргөдөлд цахимаар цугларсан гарын үсэг 40,000 давжээ. Ерөнхий сайдын хүү Тэмүүлэнгийн сүйт бүсгүй нийгмийн сүлжээнд тансаг брэнд Шанелийн гар цүнхийг барьсан зурагаа нийтэлснээр үймээн эхэлсэн тул эсэргүүцлийн бэлгэ тэмдэг нь гар цүнх болжээ. Мөн Италийн алмазан бөгж бэлгэнд авж буй болон гадаадын тансаг машин унаж байгааг нь харуулсан постууд түүний тансаг амьдралын хэв маяг нь олны анхаарлыг татсан.

Эх Сурвалж: https://news.yahoo.co.jp/articles/4205ecbfde05e52dbd82d5f06b275a3600490ee6