АНУ-ын ерөнхийлөгч Доналд Трамп, ОХУ-ын ерөнхийлөгч Владимир Путин нар Москва Киевийн хооронд 3 жилийн дараах энхийн хэлэлцээрт очихгүй бөгөөд Кремлийн зүгээс туршлагатай технократуудын багийг томилсон байна. Путин ням гарагт Украйнтай ямар нэгэн урьдчилсан нөхцөлгүйгээр Станбул хотод пүрэв гарагт хэлэлцээр хийх санал гаргажээ. Мягмар гарагийн орой Кремлээс ерөнхийлөгчийн зөвлөх Владимир Мединский, Батлан хамгаалах яамны орлогч сайд Александр Фомин нарыг багтаасан төлөөлөгчдийг зарласны дотор В.Путин байсангүй. Кремлийн зүгээс төлөөлөгчдийн багийг зарласны дараа АНУ-ын зүгээс Д.Трампыг мөн хэлэлцээрт оролцохгүйг зарласан байна. Д.Трампын Персийн булангийн орнуудаар хийж буй айлчлал үргэлжилж байна. Тэрээр өмнө нь тус хэлэлцээрт оролцох талаар бодож буйгаа илэрхийлж байсан билээ. Путин өөрийн биеэр оролцохгүй гэдгээ батлаагүй байгаа ч ОХУ, АНУ-ын ерөнхийлөгч нар байхгүй гэдэг нь дайны талаар жинтэй шийдвэр гарах хүлээлтийг багасгаж байна. Украйны ерөнхийлөгч Володимир Зеленский Путинийг “айгаагүй бол” хэлэлцээрт өөрийн биеэр ир хэмээн сорьжээ. Киевийн удирдагч Турк улс руу жолоо залаад байгаа ч Украйны албан тушаалтнууд тэр зөвхөн Путин ирсэн тохиолдолд л хэлэлцээрт орно гэж хэлсэн гэж мэдэгдэв.