ОХУ-ын төрийн мэдээний агентлаг ТАСС өмнөд Сибирийн Өвөр Байгалын хязгаарт өнгөрсөн 4 сараас хойш холбооны түвшний онцгой байдал зарласан тухай мэдээллээ. Оросын Холбооны Улсын Онцгой байдлын яамнаас өнгөрсөн лхагва гарагт бүс нутагт гараад буй гал түймэртэй чадлынхаа хэрээр тэмцэж байгаа ч 49 ойн түймэр унтарч дуусаагүй ба нийт 629,000 га газарыг хамарч байна гэж тайлагнажээ. Энэ оны эхнээс 1.4 сая давсан га газар түймэрт өртсөн нь АНУ болон Канадыг нийлүүлснээс ч өндөр байгаа юм. Түймрийн утаа энэ долоо хоногийн амралтын өдрүүд гэхэд Бээжин болон Солонгосын хойгт хүрэх талаар Европийн цаг уурын өөрчлөлт судалдаг Коперникус байгууллагын урьдчилсан мэдээнд тусгажээ. Уг түймрээс болж Оросын өмнөд Сибирийн бүс нутгуудад 4 сараас хойш онцгой байдал зарлаад байгаа юм. ОХУ-ын Бүгд Найрамдах Буриад улс бүс нутгийн хэмжээний онцгой байдал зарлаж ойд нэвтрэхийг хориглосон тухай Риа Новости мэдээлсэн. 3 сарын дунд үеэс хойш 174 ой хээрийн түймэр Буриадад гарсан. Энэ түймрүүдийн 90% нь хүмүүсийн хайхрамжгүй үйлдлээс улбаатай гэж тус агентлаг тусгажээ.

Өнгөрсөн мягмар гарагийн байдлаар Буриадад 22 идэвхитэй түймэрт 530 хүн гал түймэртэй тэмцэхээр дайчлагдсан байна. ОХУ-д энэ жил нийтдээ 2,100 ой хээрийн түймэр дэгдсэн гэсэн мэдээ байна. 3 сарын дундаас цаг агаар дулаарч хуурайшилт эхэлсэн нь олон жилийн дундаж болох 5 сараас эрт байгаа нь цаг уурын өөрчлөлтэй холбоотой гэж үзэж байна.