Ирэх пүрэв гарагт “шууд уулзалт” хийх санал Кремлийн зүгээс тавьсны дараа Володимер Зеленский Орос улс дайныг дуусгах талаар бодож буй нь “эерэг дохио” хэмээлээ. Тэр энэ үгээ ОХУ-ын ерөнхийлөгч Владимер Путин Украйныг “нухацтай хэлэлцээр”-т урьсны дараа хэлжээ. Гэвч Украйны ерөнхийлөгч “Бид ОХУ-ыг маргааш буюу 5 сарын 12-ноос удаан хугацааны, баттай, бүрэн гал зогсоох гэрээг хүлээн зөвшөөрнө гэж хүлээж байна. Тэр цагт Украйн улс уулзалтанд бэлэн байх болно” гэсэн билээ. Өнгөрсөн бямба гарагт Киев хотноо Европын удирдлагууд уулзаж даваа гарагт эхлэх 30 хоногийн гал түр зогсох гэрээний санал гаргасан.

Зеленскийн гол баримталж буй санаа бол дайн дуусгах шууд яриа хэлэлцээрт орох бол эхлээд гал зогсоох гэрээ хэрэгтэй гэж үзэж буй юм. Андрей Ермак “эхлээд 30 хоногийн гал зогсоох гэрээ, дараа нь бусад бүх зүйлс, Орос улс дайныг үргэлжлүүлэх хүсэлээ үгийн урнаар өнгөлөн далдалж болохгүй” гэж мэдэгдсэн. Харин ОХУ-ын Гадаад хэргийн яамны хэвлэлийн төлөөлөгч Мариа Захарова гал зогсоох гэрээнээс өмнө яриа хэлэлцээр болох хэрэгтэй гэж шаардаж буй юм. Тэр “Путин маш тодорхой байсан. Эхлээд суурь шалтгааны(мөргөлдөөний) тухай хэлэлцээр, дараа нь гал зогсоох тухай яриа хэлэлцээр” гэж мэдэгдсэн. Путин өөрийн мэдэгдэлдээ талууд шинэ эвлэрэлд хүрч болох боломжыг орхигдуулахгүй гэсэн ч 30 хоногийн гал зогсоох гэрээний талаар шууд тусгаагүй юм. Мөн тэрээр яриа хэлэлцээрийг өмнө зохион байгуулж байснаараа Турк улсын Истанбул хотноо зохион байгуулах хэрэгтэй бөгөөд энэ талаар тус улсын ерөнхийлөгч Ресеп Таяип Ердогантай зөвшилцөнө гэжээ. Зеленский нийгмийн сүлжээнд “Оросууд дайныг дуусгах талаар авч хэлэлцэж буй нь эерэг дохио” хэмээн нийтэлсэн байна.