Дараагийн пап ламыг сонгохоор Ромын католик шашны кардиналууд Систиний дуганд эргэн цуглаж байгаа бөгөөд энэ удаагийн кардиналуудын чуулган бол дэлхийн нийт 1,4 тербум католик шашинтнуудыг хамгийн сайн төлөөлж чадах  чуулган болж байна. Өнгөрсөн лхагва гарагт кардиналууд шашны шинэ удирдагчаа сонгохоор хуралдаж тодорхой шийдвэрт хүрээгүй нь Гэгээн Петерийн талбайгаас харагдахаар тусгайлан суулгасан янадангаас суунаглах хар утаагаар мэдэгдсэн. Орчин үеийн нэг ч пап лам эхний удаагийн хуралдаанаар сонгогдож байгаагүй. Гэхдээ өмнөх папыг сонгосон чуулганаас үзвэл 2 дахь хоногтоо шинэ пап сонгогдож болох юм. Нууц санал хураалтад 70 улсын 133 кардинал оролцсоноос 40 улсын 115 кардинал өмнөх 2013 оны чуулганд хуралдаж байсан. 5 удаагийн санал хураалтаар 2 дахь хоногийн орой нь Аргентинд төрсөн Францис агсаныг сонгож байсан бол 4 удаагийн санал хураалтаар мөн 2 хоногт Германы 8-р Бенедиктийг сонгож байсан.

Хэрэв шашны тэргүүнийг сонгож чадвал цагаан утаагаар дохио өгнө. Тодорхой тэргүүлэгч байхгүй ч Францисийн доор ватиканы 2-р хүн байсан италийн Пиетро Паролин  болон Филиппиний кардинал Луйс Антонио Таагл нарыг сонгогдох хамгийн магадлалтай гэж үзэж байна. Хэрэв энэ 2-ын аль нь ч гуравны хоёрт хүрэх давамгай саналыг авч чадахгүй бол санал бусад кардиналууд руу шилжиж сонгогчид газар зүй, номлол, адил хэл зэрэг хүчин зүйлүүдэд автаж магадгүй.

Чуулганы үеэр кардиналууд гадаад ертөнцөөс тусгаарлагдаж нууцыг чандлах тангараг өргөн, утас компьютеруудаа хураалгаж Систиний дуган болон байрлаж буй Ватиканы дэн буудлуудын хооронд л зорчих юм. Кардиналуудын зарим нь Францисийн илүү нээлттэй бодлого, реформыг үргэлжлүүлэхийг хүсэж байгаа бол бусад нь уламжлал руугаа эргэхийг хүсэж байгаа.