Ү Вон Шиг нь 1957 онд төрсөн бөгөөд БНСУ-ын хууль тогтоох төрийн дээд байгууллага болох Үндэсний ассемблейн дарга юм. 2004-2008, 2012-2024 онуудад гишүүнээр ажиллаж байсан. Үндэсний ассемблейн даргын хуваарь ерөнхийлөгч асан Юн Сог Ёль болон ерөнхийлөгчийн үүрэг гүйцэтгэгч Хан Дук Су нарыг огцруулах ажлыг удирдаж байжээ. 

Ассемблейн гишүүн болсон эхэн үедээ Үндэсний Аюулгүй Байдлын тухай хуулийг түдгэлзүүлэхийг шахаж Дээд шүүхийг тус хуулийг дэмжиж байна хэмээн шүүмжилж байв. 2007 онд тэрээр Өмнөд Солонгос дахь АНУ-н цэргийн баазууд хүрээлэн буй орчны нөхцөл байдал муу байгааг шүүмжилсэн. 2008 оны сонгуулиар суудлаа алдсан ч 2012 оны сонгуульд амжилттай өрсөлдсөн. Ү Вон Шиг нь Японы эсрэг олон компанит ажил өрнүүлсэн төдийгүй өрсөлдөгч нараасаа “Японы харцага” гэх хочыг хүртэж амжжээ. Түүний онцлох нэг кампанит ажил нь газар хөдлөлтөнд сүйрсэн Фукушимагийн атомын цахилгаан станцаас ялгарсан хаягдал усыг зайлуулах Японы төлөвлөгөөний эсрэг 2023 оны 7 сарын үед 2 долоо хоног өлсгөлөн зарлаж байсан нь юм.

Өнгөрсөн оны 12 сарын 3нд БНСУ-ын ерөнхийлөгч асан Юн Сог Ёоль онц байдал зарлаж цэргийн хүчийг дайчилсан нь тус улсын ард иргэд болон дэлхий нийтийг гайхашруулсан. Энэ үед асуудлыг шийдэмгий гартаа авч 6 цагийн дотор цагдаа цэргийн хүчнийхэний бэхлэлт дундуур бусад Үндэсний ассемблейн гишүүдтэй хамт дайрч орон онц байдлыг цуцалж алх цохисон нь ард түмнийхээ талархалыг хүлээж залуучууд нь түүнийг алх барьсан Марвелийн супер баатартай зүйрлэж “Үндэсний ассемблейн Тор” гэж нэрлэж байсан юм. Gallup Korea судалгааны институтийн явуулсан санал асуулгаар оролцогчдын 56% нь түүнд итгэж байна гэсэн хариу гарсан нь Үндэсний ассемблейдаа итгэх итгэл нь ердөө 20.6% хүртэл унасан тус улсын хувьд ер бусын үзэгдэл юм.