Япон улс ирэх оны дөрөвдүгээр сарын 1-нээс эхлэн унадаг дугуйдад торгууль ногдуулах гэж байна. Дугуй унаж явахдаа гар утас ашигласан, гэрэл дохио зөрчсөн зэрэг зөрчлүүдэд "цэнхэр тасалбар" гэгч зүйл ногдуулах замаар энэ журам хэрэгжинэ.

Унадаг дугуйтай холбоотой осол нэмэгдсэнтэй холбогдуулан тус улс өнгөрсөн жил Замын хөдөлгөөний тухай хуулиа шинэчилсэн. Уг шинэчлэлтэд дугуйчдыг торгох тухай багтсан аж. Шинэчилсэн журам нь машин, мотоциклд хэдийнэ үйлчлээд эхэлсэн билээ.

Нийт 113 төрлийн зөрчлийг цагдаагийн байгууллагаас гаргажээ. Заримыг нь дурдвал, дугуй унаж байхдаа ухаалаг утас хэрэглэвэл 12 мянган иен, гэрлэн дохиог үл тоомсорлох, зориулалтын бус замаар явах зөрчилд 6000 иенийн торгууль тус тус ногдуулна. Мөн гэмтэлтэй дугуй унаж замын хөдөлгөөнд оролцвол 5000 иенийн торгууль ногдуулна.