Хятадаас АНУ-д нийлүүлж буй бараанд ногдуулсан татварын хувь хэмжээ 145 хувь болж нэмэгдсэн тухай Цагаан ордон пүрэв гарагт мэдэгджээ.  

Ерөнхийлөгч Дональд Трамп татварын хэмжээг 125 хувь болгож өсгөсөн тухай мэдээлснээс хойш нэг өдрийн дараа дээрх мэдэгдлийг хийсэн байна. Мэдэгдэлд дурдсанаар, өмнө нь ногдуулаад байсан 20 хувийн татвар дээр нэмж дээрх хувь хэмжээг ногдуулах ажээ.

Энэхүү мэдэгдэл гарахаас өмнө Хятад улс "харилцан зөвшилцөлд хүрэхгүй бол эцсээ хүртэл тэмцэнэ” гэж мэдэгдсэн байна. Лхагва гарагт Д.Трамп өмнө нь гаргасан шийдвэрээсээ гэнэт өөрчилж, Хятадаас бусад бүх улс оронд татвар ногдуулах хугацааг 90 хоногоор хойшлуулж, бүх улсад 10 хувийн татвар ногдуулахаа зарласан билээ.

Үүний хариуд Европын Холбооноос /ЕХ/ пүрэв гарагт мэдэгдэхдээ, Европын ган, хөнгөн цагаанд ногдуулсан АНУ-ын татварын хариуд авах арга хэмжээнүүдээ түр зогсооно гэсэн байна. ЕХ ирэх мягмар гаргаас эхлэн АНУ-ын 21 тэрбум еврогийн /23.25 тэрбум ам.доллар/ бараанд татвар ногдуулахаар төлөвлөж байв.