Тайванийн зүүн хойд хэсэгт орших Йилан мужид Мягмар гаригийн /2025.04.08/ орой 23:26 цагт 5.9 магнитудын хүчтэй, өнөө өглөөний /2025.04.09/ 09:53 цагт 5.8 магнитудын хүчтэй газар хөдлөлт тус тус болжээ. Газар хөдлөлтийн голомт нь Йилан мужийн Суао тосгонд, Йилан тойргийн танхимаас зүүн өмнө зүгт 15.5 км-ийн зайд, 72.4 км-ийн гүнд байсныг Төв цаг уурын удирдах газраас мэдээлэв.

Хохирлын талаар дэлгэрэнгүй мэдээлэл хараахан гараагүй байна. Нийслэл Тайпэй хотын "Mass Rapid Transit" оператор галт тэрэгний хөдөлгөөнийг түр хугацаанд саатуулжээ.

Газар хөдлөлтийн бодит нөлөөллийг хэмждэг долоон шатлал Тайваньд байдаг. Энэ удаагийн газар хөдлөлтийн эрчим нь дөрөвдүгээр шатлалд багтахаар байжээ. Мөн газар хөдлөлтийн хүч хамгийн хүчтэй мэдрэгдсэн нь Йилан муж болон Хуалиень муж. Харин Таоюань, Шинэ Тайпэй, Тайчун, Нанту, Синчу, Чанхуа мужуудад гуравдугаар шатлалд багтахаар хүчтэй мэдрэгдсэн байна.