АНУ-ын ерөнхийлөгч Д.Трамп дотоод хүрээллийнхэндээ "Илон Маск удахгүй засгийн газрын албан тушаалаасаа огцорно" гэж мэдэгдсэн талаар Politico мэдээлжээ. И.Маск нь одоогоор Д.Трампын засаг захиргаанд Засгийн газрын үр ашгийн хэлтэс /Department of Government Efficiency буюу DOGE/-ийн тэргүүнээр ажиллаж байгаа бөгөөд түүний 130 хоногийн гэрээний хугацаа дуусах гэж байгаа юм.   

Сүүлийн үед Маскийн улс төрийн оролцоо нь шүүмжлэл дагуулж байгаа бөгөөд Висконсин мужийн Дээд шүүхийн сонгуульд түүний дэмжсэн Бүгд найрамдах намын нэр дэвшигч ялагдал хүлээсэн нь түүний нөлөөг сулруулсан гэж үзэж байна.  

Цагаан ордны хэвлэлийн нарийн бичгийн дарга Каролин Левитт эдгээр мэдээллийг няцааж, "Маск DOGE дахь ажлаа дуусмагц албан тушаалаасаа огцорно" гэж мэдэгджээ. Мөн И.Маск өөрийн бизнесүүддээ анхаарлаа төвлөрүүлэхийн тулд засгийн газрын албан тушаалаа орхихоор төлөвлөж байгаа ч, Д.Трампын зөвлөхийн хувьд албан бус үүрэг гүйцэтгэсээр байх магадлалтай гэж эх сурвалжууд мэдээлж байна.

Эх сурвалж: Politico