Украины Ерөнхийлөгч Владимир Зеленский АНУ-ын Ерөнхийлөгч Дональд Трампаас Цагаан ордонд болсон хэрүүлийн төлөө уучлал гуйжээ.

Энэ талаар АНУ-ын Ерөнхийлөгчийн Ойрхи Дорнодын асуудал эрхэлсэн тусгай төлөөлөгч Стив Виткофф мэдэгдсэн байна.

Тэрбээр энэ талаар хэлэхдээ "Зеленский Ерөнхийлөгч Трампад захидал илгээсэн.

Тэр Зууван танхимд болсон бүх үйл явдлын төлөө уучлалт гуйсан." Мөн Украины Ерөнхийлөгчийн хийсэн энэхүү алхам хоёр орны хооронд чухал ахиц дэвшил болсон гэжээ.  

Владимир Зеленский АНУ-ын Ерөнхийлөгч Трамптай хоёрдугаар сарын 28-нд сэтгүүлчдэд мэдээлэл хийх үеэр муудалцсан бөгөөд үүний дараа Украин, АНУ-ын харилцаа эрс муудсан юм.  

Уг үйл явдлын дараа Украины Ерөнхийлөгч Владимир Зеленский твиттер хуудсандаа Украин аль болох хурдан хэлэлцээрийн ширээний ард суухад бэлэн байна гэж бичжээ.

Мөн тэрбээр энэхүү уулзалтын дараа Оростой гал зогсоохыг зөвшөөрсөн бөгөөд Ерөнхийлөгч Трамп түүний энэхүү санаачлагыг сайшаасан байна. 

Эх сурвалж: rbc.ua