Еврогийн бүсийн хэрэглэгчид ба бизнес эрхлэгчдийн хувьд зээлийн хүүгийн зардлыг багасгах замаар эдийн засгийн өсөлтийг дэмжих үүднээс бодлогын хүүгээ 2.5 хувь болгож бууруулснаа Европын Төв банк пүрэв гарагт мэдэгджээ.

Тус банк мөн еврогийн бүсийн өсөлтийн талаарх урьдчилсан таамаглалаа танилцуулсан бөгөөд эдийн засаг 2025онд 0.9 хувь, 2026онд 1.2 хувиар өснө хэмээн таамаглажээ. Бодлогын хүүг бууруулснаар еврогоор гүйлгээ хийдэг 20 улсын эдийн засгийн өсөлтийг дэмжих ажээ.

Еврогийн бүсийн эдийн засаг 2024 оны сүүлийн гурван сард 0 хувийн өсөлттэй байв. АНУ-ын зүгээс холбоотон улсуудынхаа бараанд гаалийн татвар ногдуулж байгаа энэ үед Европын Төв банкны ерөнхийлөгч Кристин Лагард мэдэгдэхдээ, худалдаанд бий болсон таагүй байдал нь экспортыг бууруулж, дэлхийн эдийн засгийг сулруулж еврогийн бүсийн эдийн засгийн өсөлтийг сааруулж болзошгүй гэлээ.  

Одоогоор Европын орнууд батлан ​​хамгаалах зардлаа нэмэгдүүлэх асуудлыг хэлэлцэж байгаа бөгөөд энэ нь дэд бүтцийн зардал болон нийт өсөлтийг дэмжих боловч инфляцид нөлөөлж болзошгүй юм. 

К.Лагард пүрэв гарагт хэлэхдээ, Еврогийн бүс олон эрсдэл, тодорхойгүй байдалтай тулгараад байгааг дурдаад, Д.Трампын үед АНУ-тай худалдааны дайн хийх аюул заналхийлж, Европоос АНУ-д импортлох бараа бүтээгдэхүүнд гаалийн татвар ногдуулах магадлалтай тул Европын барааг худалдан авах дотоодын зардлыг нэмэгдүүлэхийн тулд мөнгөний зөөлөн бодлого явуулах шаардлагатай болж байна гэв.

Түүнчлэн 2022 оны 10 дугаар сард 10 хувиас давж байсан инфляцын эсрэг амжилттай тэмцэж байгаа гэдгээ Франкфурт хотод төвтэй Европын Төв банк мэдэгдсэн байна.

Инфляц өсөх үед тус банк бодлогын хүүгээ түүхэн дээд хэмжээнд буюу 4 хувьд хүргэж байсан юм. Харин инфляц буурсны дараа 2024 оны зургаадугаар сараас эхлэн бодлогын хүүг хэд хэдэн удаа дараалан бууруулаад байна.

Эх сурвалж: "Монцамэ" агентлаг