Франц улс 2024 оны эцэс гэхэд нийлүүлэх ёстой байсан олон зориулалттай “Mirage 2000-5” загварын сөнөөгч онгоцуудын эхний хэсгийг Украины талд хүлээлгэн өгчээ.

“Украины нисгэгчдийг Францад хэдэн сарын турш сургасны дараа эхний сөнөөгч онгоцуудууд Украинд ирлээ” гэж Францын Батлан хамгаалахын сайд Себастьен Лекорню олон нийтийн Х сүлжээнд бичжээ. Харин Украины Зэвсэгт хүчин хэчнээн тооны сөнөөгч онгоц хүлээж авсныг дурдсангүй. Францад бэлтгэгдсэн Украины нисгэгчдийн жолоодсон онгоцууд одоо "Украины тэнгэрийг хамгаалахад оролцоно" гэж С.Лекорню бичсэн байна. 

Францын Агаарын цэргийн хүчинд ийм загварын 26 сөнөөгч онгоц байдгаас зургааг нь Украинд нийлүүлэхээр төлөвлөж байсныг BFMTV суваг мэдээлжээ. 

Францын Ерөнхийлөгч Эммануэл Макрон “Mirage-2000” сөнөөгч онгоцны эхний хэсгийг 2024 онд багтаан Украинд нийлүүлнэ гэж өнгөрсөн оны зургаадугаар сарын эхээр мэдэгдэж байсан юм. Харин хугацааг 2025 оны эхний улирал болгон хойшлуулсныг Батлан хамгаалахын сайд Лекорню 10 дугаар сард мэдэгдсэн байна.

“Mirage 2000-5” бол “Mirage 2000” байлдааны онгоцны шинэчилсэн загвар юм. Уг сөнөөгч нь сайжруулсан радартай бөгөөд агаар-агаар ангиллын “Mica” пуужин, мөн  Украинд нийлүүлж буй Францын "SCALP-EG" далавчит пуужингуудаар зэвсэглэжээ.