ВАШИНГТОН, 2025 оны хоёрдугаар сарын 4 /VOA/. Оросын эсрэг дайнд санхүүгийн дэмжлэг үзүүлсний төлбөр болгон Украин улс АНУ-д газрын ховор элемент нийлүүлэх боломжтой гэж Ерөнхийлөгч Дональд Трамп даваа гарагт мэдэгджээ.

Д.Трамп Цагаан ордонд сэтгүүлчдэд хандан хэлэхдээ, Украины тал ийм хэлэлцээр байгуулахад бэлэн байгааг онцлоод Вашингтоноос олгосон 300 орчим тэрбум ам.долларын тусламжийн хариуг Киев өгөөсэй хэмээн хүсэж байгаагаа дурдсан байна. 

“Украин бол газрын ховор элементүүдээр баялаг орон. Бид Украинтай газрын ховор элемент болон бусад баялгаараа бидний тусламжийн төлбөрийг төлөх гэрээ байгуулах хүсэлтэй байна” гэж тэрбээр хэлжээ. Д.Трамп "газрын ховор элемент" гэсэн нэр томъёог чухал хэрэгцээт ашигт малтмалууд гэсэн өргөн утгаар хэрэглэсэн үү эсвэл яг газрын ховор металлын талаар хэлсэн үү гэдэг нь тодорхойгүй байна.

Украин улс уран, лити, титаны томоохон ордуудтай боловч тэдгээрийн аль нь ч дэлхийн хамгийн том таван ордын тоонд багтдаггүй. АНУ мөн эдгээр болон бусад чухал ашигт малтмалын ашиглагдаагүй нөөц ихтэй.

АНУ-д газрын ховор элементийн ганцхан уурхай ажиллаж байгаа бөгөөд эдгээр элементүүдийг боловсруулах боломж маш хязгаарлагдмал байдаг. Гэхдээ хэд хэдэн компани холбогдох төслүүдийг хэрэгжүүлэхээр ажиллаж байна.  Газрын ховор элемент болон бусад нэн чухал ашигт малтмалын дэлхий дээрх хамгийн том нийлүүлэгч бол Хятад улс юм.

Эх сурвалж: "Монцамэ" агентлаг