Засгийн газраас энэ сарын 10-наас эхлэн Замын-Үүд боомтод гурван сарын хугацаатай онцгой дэглэм тогтоохоор болсон билээ. Энэ хугацаанд тус боомтод ЦЕГ-ын 805 цэргийн ангиас дотоодын цэргүүдийг дайчилж ажиллуулах юм. Цэргүүд хилийн “0” бүсээс гаалийн хяналтын терминал хүртэл тээвэр хийх бөгөөд ингэснээр тээврийн үнийг бууруулна гэж үзэж байгаа юм. Мөн халдвар хамгааллын дэглэмийг сахиулах гол зорилготой юм. 

Улсын эдийн засаг, хүн амын үйлчилгээний хэвийн нөхцөлийг хангахад нэн чухал үүрэг бүхий тодорхой үйлдвэрийн газар, байгууллагад шаардлагатай гэж үзвэл нийтлэг баримталдаг хууль тогтоомжийн заалтыг хэрэглэхгүйгээр зургаан сар хүртэл хугацаагаар тусад нь онцгой дэглэм тогтоож, өөрийн шууд хяналтад авч ажиллуулах эрхийг Монгол Улсын Засгийн газарт хуулиар олгосон байдаг. Онцгой дэглэм тогтоосноор Засгийн газар тус бүс нутагт дараах эрхийг эдлэхээр болж байна. Үүнд:

Зохион байгуулалтын бүтэц, үүргийг тогтоох, бүх шатных нь удирдах ажилтныг томилох;

Ажлын өдөр, цагийн дэглэм, ээлжийг өөрчлөн тогтоох;

Хөдөлмөрийн норм, цалин хөлсийг шинэчлэн тогтоох,

Үндсэн ба эргэлтийн хөрөнгө, түүний дотор түүхий эд, материалын нийлүүлэлт,.....  нь тусгай хяналт тогтоох;

Засгийн газраас тогтоосон онцгой журмыг хэрэгжүүлэхэд саад учруулсан улс төр, олон нийтийн байгууллагын үйл ажиллагааг тухайн үйлдвэрийн газар, байгууллага дээр түр зогсоож, хяналт тогтоох;

Тухайн үйлдвэрийн газар, байгууллагад хөдөлмөрийн сахилгын тухайлсан дүрэм, олон нийтийн хэв журам сахиулах тусгай журам тогтоож, тэдгээрийг зөрчигчдөд харьяалал харгалзахгүйгээр зохих хариуцлага хүлээлгэх;

Онцгой дэглэмтэй үйлдвэрийн газар, байгууллагын хэвийн ажиллагаа алдагдахад хүрвэл хүн хүч, тээврийн хэрэгслийн дайчилгаа явуулах;

Онцгой дэглэмтэй үйлдвэрийн газар, байгууллагаас бусадтай байгуулсан гэрээг өөрчлөх буюу цуцлуулах;

Улсын захиалга, даалгаврыг биелүүлээгүй тохиолдолд захиргааны хариуцлагын арга хэмжээ тогтоож хэрэглэх;

Хүн амын хүнсний болон өдөр тутмын хэрэглээний ховор олдоцтой барааг хуваариалах, тээвэрлэх, худалдан борлуулах, хил нэвтрүүлэх тусгай журам тогтоож, тэдгээр барааг дамлан худалдах, шунахай зорилгоор их хэмжээтэй нөөцлөх зэргээр дотоод зах зээлд барааны хомсдлыг зориуд бий болгохтой тэмцэхээс сэргийлэх, таслан зогсоох болон хариуцлагын арга хэмжээ тогтоон хэрэглэх эрхтэй болох юм. 

Тээврийг дотоодын цэрэгт хариуцуулснаар Замын-Үүдэд тээвэр хийдэг 7000 жолооч үндсэндээ ажилгүй болох учир дээрх шийдвэрийг эсэргүүцэж буй. Шийдвэр хэрэгжсэнээр үнийн өсөлтөд жолооч нарын оролцоо хэр байсан нь тодорхой болох юм.