BLACKPINK хамтлагийн гишүүн Женни болон Канадын алдарт дуучин The Weeknd нар Сөүл хотын Гоян цэнгэлдэх хүрээлэнд болсон The Weeknd-ийн "After Hours Til Dawn" аялан тоглолтын үеэр анх удаа хамтдаа нэг тайзан дээр гарч дууллаа.

Тэд HBO телевизийн "The Idol" цувралын саундтрек болох "One of the Girls" хит дуугаа анх удаа хамтран амьдаар дуулж, цугласан олон мянган фэнүүддээ гэнэтийн бэлэг барьжээ. Женни тайзан дээр гэнэт гарч ирэхэд үзэгчид шуугилдаж, тоглолтын уур амьсгалыг улам халаасан байна.

Дэлхийн хөгжмийн чартуудад өндөр амжилт үзүүлсэн уг дууг тэд ийнхүү анх удаа нэгэн тайзнаас эгшиглүүлсэн нь олон улсын хэвлэл мэдээллийн хэрэгслүүд болон сошиал сүлжээнд ихээхэн анхаарал татаад байна.