Испанийн нэрт дуучин Хулио Иглесиасийг түүнд ажиллаж байсан хоёр эмэгтэй бэлгийн хүчирхийлэл үйлдсэн хэмээн мэдэгджээ.

Дуучин дээрх хоёр эмэгтэйг Доминиканы Бүгд Найрамдах Улсын Пунта Кана, Багамын арлуудын Лифорд Кей дэх өөрийн өмчид ажиллуулж байжээ. Тэдний мэдүүлгээр бэлгийн хүчирхийлэл 2021 онд болсон байна. Испанийн elDiario.es мэдээллийн сайт болон АНУ-ын “Univision” сонинд нийтлэгдсэн уг мэдэгдлийг Испанийн шүүх шалгаж байгаа аж.

Өдгөө 82 настай Хулио Иглесиас нь 1960-аад оноос хойш Испанид алдартай болж, дэлхийн поп хөгжмийн домог гэгдэхээр нэр алдарт хүрсэн. Тэрбээр дэлхий даяар 300 сая гаруй пянз борлуулсан бөгөөд испани хэлээр уран бүтээл туурвидаг хамгийн амжилттай уран бүтээлч юм.