Ази төдийгүй дэлхийн үзэгчдийн анхаарлын төвд ороод буй Netflix-ийн “Physical: Asia” шоуны продюсер Чан Хо Ги өнгөрсөн долоо хоногт Холливүүдийн энтертайнмэнт мэдээний Deadline.com сайтад ярилцлага өгчээ.

Ингэхдээ тэрбээр уг шоуны санаа анх хэрхэн төрсөн, оролцох улс орнуудыг ямар зарчмаар сонгосон талаараа ярьсан байна. Цаашлаад Монгол Улсыг яагаад сонгосон талаар тэр онцгойлон дурдсан байна.

Чан Хо Гигийн хэлснээр, “Physical: 100” шоуны хоёр бүлэг гарснаас хойш дэлхийн олон газраас янз бүрийн санал ирсэн бөгөөд тэдний дунд Монголын талаас ирүүлсэн санал онцгой анхаарал татсан гэнэ.

Тэр “Энэ сонголт бусдаасаа бага зэрэг өөр байсан. Учир нь ‘Physical: 100’-ийн нэг, хоёрдугаар бүлгийн дараа бид олон хүнтэй уулзсан. Тэдний дунд Монголын Засгийн газрын албаны төлөөлөл байсан. Тэд надад Солонгос, Монголын тус бүр 15 тамирчин оролцсон хамтарсан шоу хийх санал тавьсан. Энэ санаа сонирхолтой байсан ч би "Хэрвээ илүү олон орныг оролцуулж, Азийн хэмжээнд хийвэл бүр сонирхолтой биш гэж үү?’ гэж бодсон” хэмээн ярьжээ.

Ингэснээр “Physical: Asia” шоуны санаа бүрэлдэж, Монголын тал өөрийн шилдэг оролцогчдыг сонгоход тусалсан байна.

Мөн сэтгүүлч түүнээс дараагийн хувилбаруудын талаар асуухад, Чан “Би Бразилын үзэгчдээс ‘Physical: 100’-ийн Бразил хувилбарыг хийх тухай олон санал авч байна. Тус улс спортын хүчирхэг гүрэн, олон дэмжигчтэй учраас энэ санаа надад таалагдаж байгаа. Мөн Африкийн хувилбарыг хийх хүсэлтүүд ч ирж байгаа” гэжээ. Түүнчлэн “Physical: 100” шоуны АНУ болон Италийн хувилбаруудын бүтээлийн ажил аль хэдийн эхэлсэн талаар тэр мэдээлсэн байна.

Та илүү дэлгэрэнгүй ярилцлагыг ЭНД дарж орж үзнэ үү.