Азийн хүчтэнүүдийн тулаан эхэллээ. Netflix-ийн шинэ реалити шоу “Physical: Asia” дэлхийн үзэгчдийг аль хэдийнэ байлдан дагуулж байна. Хүч чадал, сэтгэлийн тэвчээр, хамтын ажиллагааг сорьсон энэ шоуны анхны дугаараас л Монголын баг олон улсын анхаарлын төвд оржээ. Үзэгчид Монголын төлөөллийг “хүчирхэг, эвтэй, үнэхээр сэтгэл шингээж өрсөлдөгчид” хэмээн үнэлж, зарим нь бүр “тэд ялалт авах байсан, хэрвээ бусад баг нийлж шахаагүй бол” хэмээн дэмжсэн байна. Харин зарим гадаад хэвлэл ч Монголын оролцогчдыг “Чингисийн удам” хэмээн бахархалтайгаар дүрсэлжээ.

The Guardian сонинд “Монголын оролцогчид дэлгэцэн дээр гарах бүрт бүргэдийн дуу авиа гарч, тэд Чингис хааны удам гэдгээ бахархалтайгаар онцолдог” хэмээн тэмдэглэсэн байна. Энэ нь гадаад үзэгчдийн анхаарлыг татаж, Монголын багийн ялгарах хэв шинжийг тодотгожээ.

Харин Reddit-ийн форумд үзэгчид Монголын багийн тухайд “Бусад орнууд нийлж Монголыг шахаж байна”, “Хэрвээ тэднийг эсрэгээрээ биш, шударгаар өрсөлдсөн бол Монгол ялж болох байсан” гэх мэт сэтгэгдэл бичсэн байна.

Мөн The National News сонинд нийтэлснээр тус шоу нийт найман улсын (БНСУ, Япон, Тайланд, Филиппин, Индонез, Вьетнам, Энэтхэг, Монгол) нийт 48 хүчтэн оролцож байгаа бөгөөд Монголын төлөөлөл хүч чадал, эв нэгдлээрээ бусдаас ялгарч байгаа талаар онцолжээ.

“Physical: Asia” нь алдарт “Physical: 100” нэвтрүүлгийн олон улсын хувилбар бөгөөд Азийн хүчирхэг өрсөлдөгчдийг нэг тайзан дээр авчирч буйгаараа онцлог юм. Шоуны эхний ангийг үзсэн гадаад үзэгчид Монголын багийн тоглолт, хандлага, бэлтгэлтэй байдлыг өндөр үнэлж, дараагийн дугаарыг тэсэн ядан хүлээж байна.