Өмнөд Солонгосын Кёнжү хотноо энэ сарын 29-нд болох Ази Номхон Далайн Эдийн Засгийн Хамтын Ажиллагааны (APEC) CEO Summit-д BTS хамтлагийн ахлагч Ким Намжун буюу RM үндсэн илтгэл тавихаар боллоо. Энэ нь К-поп урлагийн түүхэнд анхны тохиолдол юм.

Түүний илтгэлийн сэдэв нь “АПЕК бүс нутгийн соёл, бүтээлч үйлдвэрлэл ба Солонгос соёлын зөөлөн хүч” бөгөөд К-поп болон Солонгос соёлын дэлхий дахинд үзүүлэх нөлөө, эдийн засгийн ач холбогдлыг онцлох зорилготой юм.

Илтгэлийн үеэр RM BTS хамтлагийн туршлагаас жишээ авч, соёл урлагийн хүчээр улс орнууд хоорондын харилцаа, ойлголцлыг хэрхэн бэхжүүлж болох талаар үзэл бодлоо хуваалцах төлөвтэй байна. Энэ нь бүс нутгийн соёлын эдийн засгийн чадавхи, зөөлөн хүчийг хөгжүүлэхэд чухал ач холбогдолтой бөгөөд APEC-ийн энэ жилийн “Beyond, Business, Bridge” сэдэвтэй нийцэж байна.

Тус уулзалтад 16 орны төрийн тэргүүн болон 1700 орчим бизнесийн удирдагчид оролцохоор төлөвлөгджээ. Илтгэлийн бичлэг болон дэлгэрэнгүй мэдээллийг APEC CEO Summit-ийн албан ёсны вэбсайтаас үзэх боломжтой.