Алдарт "Нэтфликс" компани болон Өмнөд Солонгосын MBC сувгийн продюсер Жан Хо Ги нарын хамтын бүтээл болох "Physical 100" шоуны удаах анги болох "Physical Asia" нэвтрүүлэгт Монголын баг бүрэлдэхүүн оролцож буй. Тус шоунд Монгол Улсаа төлөөлж,

• Монгол Улсын арслан Б.Орхонбаяр,
• Жүдогийн үндэсний шигшээ багийн тамирчин ОУХМ А.Адьяасүрэн,
• Холимог тулаанч Б.Энх-Оргил,
• 3х3 сагсан бөмбөгийн шигшээ багийн тамирчин Э.Дөлгөөн,
• Волейболын үндэсний шигээ багийн тамирчин ОУХМ Г.Хандсүрэн,
• МУГЖ, уран нугараач Э.Лхагва-Очир нарын дөрвөн эрэгтэй, хоёр эмэгтэй хүн багтсан байдаг. Энэхүү нэвтрүүлэг нь биеийн хурд хүч, авхаалж самбааг сорьсон даалгавруудыг биелүүлдэг юм.

Тэгвэл уг шоунд оролцсон Волейболын үндэсний шигээ багийн тамирчин ОУХМ Г.Хандсүрэн цахим хуудсаараа дамжуулан "Бүтэн баг байдаг шүү дээ бүгдийн ард. Нэр дурдагдсан хүн бүрт талархал дэвшүүлье. Хайр дүүрэн тэврэлт илгээе. Юуг яаж, ямар юунаас хэн яасныг монголчууд, дэлхий үзэх нь дээ. Юу юуны түрүүнд манай улсыг байдаг гэж мэдэхгүй нөхдүүд бий шүү дээ. Эх орноо таниулан тэнд зогссон нь бахархал дүүрэн явдал байв" гэлээ.

Олон улсын шилдэг баг тамирчид нэг тэрбум воны шагналын төлөө өнөөдөр /2025.10.28/-аас өрсөлдөх юм.