Тайваньд хэд хэдэн алдартнууд цэргийн албанаас зайлсхийсэн хэрэгт сэжиглэгдэн баривчлагджээ. Албаныхны мэдээллээр Energy хамтлагийн гишүүн Хсие Күн-да, жүжигчид Чен Бо-лин, Хсиу Чиех-кай нар цэргийн үүргээ биелүүлэхээс зайлсхийхийн тулд хуурамч эмнэлгийн бичиг ашигласан байж болзошгүй байна.

43 настай Хсие Күн-да нь 2010 онд “өндөр даралттай” гэх шалтгаанаар цэргийн албанаас түр чөлөөлөгдсөн ч уг онош хуурамч байсан байж магадгүй хэмээн мөрдөн шалгаж байгаа аж. Түүнийг өнгөрсөн долоо хоногт Тайпэй хотод баривчилсан бөгөөд бусад алдартнуудын хамтаар шүүхийн шийдвэр хүлээж байна.

Тайванийн хуулиар цэргийн үүргээс санаатайгаар зайлсхийсэн этгээдэд тав хүртэл жилийн хорих ял оноох боломжтой. Батлан хамгаалах яамнаас “цэргийн алба нь ард иргэдийн үүрэг бөгөөд хэн ч, тэр дундаа олны танил хүмүүс ч хуулиас дээгүүр байж болохгүй” гэж мэдэгдэв.

Энэхүү дуулиан олон нийтийн анхаарлыг татаж, Тайванийн нийгэмд шударга ёсны талаар өргөн хэлэлцүүлэг өрнүүлж байна. Иргэдийн зүгээс “алдартнууд хуулийг тойрч гардаг үзэгдлийг таслан зогсоох ёстой” гэсэн байр суурийг илэрхийлжээ.