Гэр бүл, хөдөлмөр, нийгмийн хамгааллын яамны хөгжлийн бэрхшээлтэй хүний эрхийг хангах дэд зөвлөл хуралдлаа.

Манай улсад 115 мянган хөгжлийн бэрхшээлтэй иргэн бий. Эдгээр иргэдийн 80 гаруй хувь нь хөдөлмөрийн насныхан байгаа юм.

Хөгжлийн бэрхшээлтэй хүний эрхийг хангах дэд зөвлөлөөс 2024 онд 28 ажил төлөвлөснөөс 10 нь бүрэн хэрэгжиж, 18 ажил нь хэрэгжих шатанд явна.

Тухайлбал, Хөгжлийн бэрхшээлтэй хүний эрхийн тухай хуулийн шинэчилсэн найруулгын төслийг боловсруулж, Засгийн газрын хуралдаанаар хэлэлцүүлж, УИХ-д өргөн барих ажлыг эрчимжүүлж байна.

Хөгжлийн бэрхшээлтэй хүний эрхийн тухай хууль 2016 батлагдаж байсан.

Мөн Саадгүй байдал, хүртээмжийн тухай анхдагч хуулийн төслийг боловсруулж, УИХ-д өргөн барихаар бэлтгэж байна.

Үүнээс гадна үйлдлийн олон улсын ангиллыг нэвтрүүлж, Хөгжлийн бэрхшээлтэй хүний талаарх холбогдох маягт, аргачлалыг шинэчлэн батлуулж, статистик мэдээллийг сайжруулах ажлыг хийж байна.

2025 онд Байнгын асаргаатай хөгжлийн бэрхшээлтэй хүүхдийн хөгжлийг дэмжиж, хамтарч ажиллана.

Мөн салбарын хэмжээнд хийгдсэн саадгүй байдал, хүртээмжийн үнэлгээтэй холбоотой хяналт, шалгалт хийж, сайжруулах төлөвлөгөөг боловсруулах зэрэг ажил хийхээр төлөвлөж байна гэж Гэр бүл, хөдөлмөр, нийгмийн хамгааллын яамнаас мэдээллээ.