Лос Анжелес хот орчимд түймрийн аюултай байдал үүсээд буй. Тэгвэл тус голомтод ажиллаж, амьдардаг монголчуудтай холбогдсон эсэх, одоо нөхцөл байдал ямар байгаа талаар Гадаад харилцааны яамнаас тодрууллаа.

ГХЯ-наас өгсөн мэдээллээр, эхний ээлжинд АНУ-ын Сан Франциско хотод суугаа Ерөнхий консулын газраар дамжуулж монгол иргэдийн холбоотой холбогдож мэдээллүүдээ солилцож байна. Одоогоор түймэрт өртсөн монгол хүн байхгүй. Цагийн зөрүүнээс шалтгаалж байгаа ч тогтмол мэдээллээ солилцож байна. Түймрийн голомт болон голомт тойрсон хотуудад 5000 орчим монгол иргэн бий. Одоогоор монголчууд олноор оршин суудаг мужуудад аюул бага байна гэлээ.

Лос Анжелесийн монголчуудын холбооноос, Лос Анжелес хот орчимд тархаж буй түймрийн аюултай байдалтай холбоотой тус хот орчимд, ялангуяа түймрийн голомт, түүнтэй ойр ажиллаж амьдардаг Монголчуудад анхааруулга, авч хэрэгжүүлэх заавруудыг мэдээлж байгаа аж.

Хэрэв түймрийн голомтод байгаа хүнд яаралтай тусламж, орчуулга хэрэгтэй бол (213)292-4925 дугаараар холбогдох, эсвэл [email protected] хаягаар хандах боломжтой.

Лос-Анжелес муж даяар дэгдэж буй гал түймрийн голомт дарагдаагүй хэвээр байгаа бөгөөд таван хүн харамсалтайгаар нас барсан. Тус түймрийн голомтод байгаа монголчууд аюулгүй байгаа эсэх талаар бид дахин тодруулж мэдээлнэ.