Улаанбаатарын тээврийн хэрэгслийн тоо жилээс жилд нэмэгдэж байгаа нь утааг нэмэгдүүлж агаарын бохирдолд нөлөөлж байна гэж үзэж буй. "Агаарын бохирдол үүсгэж буй хэд хэдэн зүйл бий.

Нийт агаарын бохирдлын 56 орчим хувийг гэр хорооллын айлуудын яндангаас гарч буй утаа, 29 хувийг замын хөдөлгөөнд оролцож байгаа тээврийн хэрэгслийн утаа, 16 хувийг уурын зуухууд болон цахилгаан станцуудын агаарт ялгаруулж байгаа химийн хортой бодисууд бүрдүүлж байна гэдгийг Жайка-гийн тайланд дүгнэсэн" гэж хотын дарга мэдээлсэн. Тийм ч учраас дээр хэлсэнчлэн эхний ээлжид тээврийн хэрэгслийн татварыг нэмж, торгуулиа төлөөгүй жолоочийг шийтгэх зэрэг журмуудыг хэрэгжүүлж байгаа билээ.

ОРОН НУТГИЙН ДУГААРТАЙ ТЭЭВРИЙН ХЭРЭГСЛЭЭС ХОНОГ ТУТАМД 5000 ТӨГРӨГ НЭХЭМЖИЛНЭ 

Нийслэлийн Иргэдийн Төлөөлөгчдийн Хурлын тогтоолоор улаанбаатар хотод нэвтрэн орж ирж буй орон нутгийн дугаартай тээврийн хэрэгслийн төлбөрийн хувь хэмжээг тогтоож өгсөн. Уг тогтоол өнгөрсөн оны есдүгээр сарын 1-нээс хэрэгжиж эхэлсэн билээ. Өөрөөр хэлбэл, улаанбаатар хотод нэвтэрсэн орон нутгийн дугаартай тээврийн хэрэгсэлд 5000 төгрөгийн нэхэмжлэл үүсч эхэлсэн. Тодруулбал, орон нутгийн дугаартай тээврийн хэрэгсэлтэй жолооч нийслэл 48 цаг байхад 1000 төгрөг, 48 цагаас дээш хоног тутамд 5000 төгрөгийн нэхэмжлэл үүсч байгаа.

ИМПОРТООР ОРЖ БУЙ МАШИН 5 ШАЛГУУРЫГ ДАВНА

Өнгөрсөн оны арваннэгдүгээр сарын 8-наас эхлэн импортоор оруулж ирж буй машинд улаанбаатарын дугаар олгохгүй байх журам хэрэгжиж эхэлсэн. Ингэхдээ дараах таван шалгуурыг давж байж улаанбаатарын дугаар авна.

• Тээврийн хэрэгслийн өмчлөгч, эзэмшигч нь нийслэлийн оршин суугч иргэн, нийслэлд бүртгэлтэй хуулийн этгээд байх
• Өмчлөгч, эзэмшигч нь Авто замын тухай хуульд заасан төлбөр, Зөрчлийн тухай хуулийн 14 дүгээр бүлгийн 14.7 дугаар зүйл дэх зөрчил болон төлбөрөө барагдуулсан байх. Жолоочийн даатгалын тухай хуульд заасны дагуу даатгуулсан байх
• Тээврийн хэрэгслийн хөдөлгүүрийн экологийн ангилал нь “евро-4” эсвэл түүнтэй дүйцэхүйц буюу түүнээс дээш байх
• Сүүлийн 10 жилийн дотор үйлдвэрлэгдсэн тээврийн хэрэгсэл байх
• Экспортын өмнөх техникийн хяналтын үзлэгт орсон байх зэрэг шалгуурыг тавьж буй.

ТЭЭВРИЙН ХЭРЭГСЛИЙН АЛБАН ТАТВАР 5 ДАХИН, ЗАМ АШИГЛАСНЫ ТӨЛБӨР 3 ДАХИН НЭМЭГДЭВ

НИТХ нийслэлийн 2025 оны төсвийг батлахдаа Авто тээврийн болон өөрөө явагч хэрэгслийн албан татварын хувь хэмжээ болон авто зам ашигласны төлбөрийн хэмжээг шинэчлэн батлах тухай тогтоолын төслийг баталсан. Ингэхдээ тээврийн хэрэгслийн албан татварыг гурав, авто зам ашигласны төлбөрийг тав дахин нэмэгдүүлэхээр тусгасан бөгөөд энэ тогтоол нэгдүгээр сарын 1-нээс хэрэгжиж эхлэв. Жолооч нар тээврийн хэрэгслийн моторын багтаамжаас хамаарч харилцан адилгүй татвар төлдөг. Тэгвэл 1500 хөдөлгүүртэй тээврийн хэрэгсэл жилд тээврийн хэрэгслийн албан татварт 36000 төгрөг төлдөг байсан бол шинэ хуулиар 3 дахин нэмэгдүүлж буюу 108 мянган төгрөг төлөхөөр байна. Тэгвэл дээрх тээврийн хэрэгсэл автозам ашигласны төлбөрт 20 мянган төгрөг төлдөг байсан бол мөн шинэ хууль хэрэгжиж эхэлснээр 100 мянган төлөх юм.

Харин 3500см3 хөдөлгүүртэй тээврийн хэрэгсэл 114,048төгрөг төлдөг басан бол 3 дахин нэмэгдсэнээр 342,144 төгрөг тээврийн хэрэгслийн албан татварт төлөхөөр болж байна. Мөн автозам ашигласны төлбөрт жилд 40 мянган төгрөг төлдөг байсан тэгвэл одоо 200 мянган төгрөг төлөх юм.

Энэ мэт тээврийн хэрэгслийн моторын багтаамжаас хамаарч албан татварт 3 дахин нэмэгдүүлж, автозам ашигласны төлбөрийг 5 дахин нэмэгдүүлж төлөх хуулийн заалт хэрэгжиж эхэллээ.

 НҮҮРСЭН ЯНДАНГҮЙ АВТОМАШИНЫГ ЗАМЫН ХӨДӨЛГӨӨНД ОРОЛЦУУЛАХГҮЙ, ЖУРАМЛАНА

Хотын дарга нэг удаа мэдээлэл хийх үеэрээ, агаарын бохирдолд нүүрсэн яндангүй автомашинуудын нөлөө их байгааг хэлж байв. Өөрөөр хэлбэл сүүлийн үед автомашинууд, тэр дундаа приус загварын машинуудын нэлээд хувь нь зориулалтын нүүрсэн яндангүй замын хөдөлгөөнд оролцож байгаа аж. Энэ нь агаарт хамгийн их хортой бодис ялгаруулдаг юм байна. Тийм учраас нүүрсэн яндангүй замын хөдөлгөөнд оролцож байгаа автомашины жолоочид эхний удаад сануулаад, дараагийн удаад машиныг нь журамлах тогтоол хэрэгжиж эхэлсэн.

Цаашлаад шатахуун өгөхгүй байх хүртэлх арга хэмжээг авахаар болж байгаа ажээ.

Тодруулбал, шатахуун авахаар ирсэн хайбрид хөдөлгүүртэй машины яндангаас гарч буй утааг нэг удаагийн түргэвчилсэн тестээр шалгаж зөвшөөрөгдсөн хэмжээнээс хэтэрсэн агаарын бохирдол ялгаруулж байгаа тохиолдолд шатахуун өгөхгүй зохицуулалтыг хэрэгжүүлнэ гэж хотын дарга мэдэгдэв.

Улаанбаатар хотод 800 мянга гаруй тээврийн хэрэгсэл бүртгэлтэй байгаа аж. Эдгээр тээврийн хэрэгслээс өдөрт дунджаар 350,000-400,000 тээврийн хэрэгсэл замын хөдөлгөөнд оролцдог байна.