АНУ-ын Ерөнхийлөгч Жо Байден 2.5 тэрбум ам.долларын шинэ багц цэргийн тусламжийг Украинд үзүүлэхээр шийдвэрлэснээ даваа гарагт мэдэгджээ. 

Энэ удаагийн тусламжийн багц нь хоёр хэсгээс бүрдэж байгаа бөгөөд эхнийхэд АНУ-ын армийн нөөцөд байгаа нийт 1.25 тэрбум ам.долларын үнэтэй зэвсэг багтаж байгаа бол хоёр дахь нь Украины аюулгүй байдалд туслах санаачилгын (USAI) хүрээнд Америкийн үйлдвэрлэгчдээс зэвсэг худалдан авахад зориулж 1.22 тэрбум ам.доллар хуваарилах юм.

Ингэснээр АНУ-аас Украинд “байлдааны талбарт давуу байдлыг олж авах боломжийг олгох хойшлуулшгүй тусламжийг төдийгүй, урт хугацаанд нийлүүлэх агаарын довтолгооноос хамгаалах систем, их буу болон бусад чухал зэвсгийн тусламжийг” үзүүлж байна гэж Цагаан ордны хэвлэлийн мэдээнд дурджээ. Түүнчлэн АНУ-ын Конгрессоос энэ онд USAI-ийн хүрээнд олгосон бүх хөрөнгө мөнгийг ашиглаж дууссаныг дурдсан байна. "АНУ-ын Батлан хамгаалах яам их бууны хэдэн зуун мянган сум, олон мянган пуужин, олон зуун хуягт машиныг нийлүүлэх шатандаа байна" гэж хэвлэлийн мэдээнд мөн дурджээ. Жо Байдены нэрийн өмнөөс түүний ерөнхийлөгчийн бүрэн эрхийн хугацаа нэгдүгээр сард дуусах хүртэл "АНУ энэ дайнд Украины байр суурийг бэхжүүлэхийн тулд тууштай ажилласаар байх болно" гэж онцолсон байна. 

Эх сурвалж: "Монцамэ" агентлаг