Бангкокоос Өмнөд Солонгос руу 175 зорчигч, багийн зургаан гишүүнтэй нисэж явсан БНСУ-ын агаарын тээврийн "Jeju Air" компанийн онгоц энэ сарын 29-ны өдөр /2024.12.29/ орон нутгийн цагаар 09:50 цагийн орчимд Сөүлээс баруун өмнө зүгт 288 км-ийн зайд орших "Муан" нисэх онгоцны буудалд газардах үедээ онгоцны "буух төхөөрөмж" нээгдээгүйн улмаас гулсаж, хамгаалалтын хашаа мөргөж осолдсон харамсалтай осол гарсан билээ. 

Тэгвэл тухайн үйл явдалтай холбоотойгоор Монголын иргэний агаарын тээвэр манантай үед газардаж буй бичлэгийг иргэд өөр өөрийнхөөрөө тайлбарлаж, цахим сүлжээнд байр сууриа илэрхийлж байна. 

Тэгвэл МИАТ хариуцлагагүй үйлдэл гаргаж, зорчигчдоо эрсдэлд оруулж, манантай үед газардсан уу гэдгийг МИАТ-ийн захирал Б.Мөнхтамираас тодрууллаа. Тэрбээр "МИАТ олон улсын Иргэний нисэхийн дүрмийн аюулгүй ажиллагааны бүх стандартыг мөрдөж нислэгээ үйлддэг бөгөөд аюулгүй ажиллагааны аудитад тогтмол хамрагдаж гэрчилгээ эзэмшдэг эйрлайн. Энэ талаар өмнө ч хэлж байсан. Бид стандартийнхаа дагуу зөвшөөрөгдсөн хэмжээнд үйл ажиллагаа явуулдаг. Хөндлөнгийн салхины хэмжээ, үзэгдэх орчин, тухайн эйрпортын тоноглол, онгоцны өөрийн тоноглол, жингийн тооцоолол гэх мэт олон хүчин зүйлийн тооцоололоор нислэг үйлддэг. Энэ бүх стандартыг зөрчөөд эрсдэлд орж хөөрөлт, бууралт хийдэг юм гэж хаана байхгүй. МИАТ буулт хийж л байгаа бол бусад авиа компаниуд мөн хийж болно л гэсэн үг. Зарим тохиолдолд тухайн компанийн стандарт олон улсын стандартаас илүү өндөр байх тохиолдол байдаг" гэлээ.