Улаанбаатар, 2024 оны арванхоёрдугаар сарын 24 /МОНЦАМЭ/. Зуун зууныг дамжин өвлөгдөж ирсэн үндэсний үнэт өв соёлын нэг болох үндэсний бөхийн барилдааныг олон улсад сурталчлах өдөрлөг Монгол Улсын түүхэнд анх удаа далайн эрэгт болж байна.

Тодруулбал, үндэсний бөхийн “Нэгдэл” клуб, “Газарчин аялал” компанитай хамтран сүүлийн жилүүдэд монголчууд төдийгүй, гаднын жуулчид ихээр очих болсон Вьетнамын үзэсгэлэнт Фукоук арлын “Wyndham grand” зочид буудлын “Ganh dau” далайн эрэгт зохион байгуулж байгаа юм. Өчигдөр болсон үзүүлэх барилдааныг далайн эрэгт амарч байсан 50 гаруй жуулчин үзэж, сонирхсон бол маргааш дахин зохион байгуулах аж.

Далайн эрэгт болж буй үзүүлэх барилдаанд улсын заан Д.Хүдэрбулга, харцага Г.Ганхуяг, Ш.Пүрэвгарьд, аймгийн хурц арслан Н.Өсөхбаяр, аймгийн арслан Ч.Алтангэрэл, М.Мөнхбаяр, Г.Төрмөнх, аймгийн заан С.Ган-Эрдэнэ, сумын заан Д.Төгс-Эрдэнэ нар оролцож байгаа юм.

Эх сурвалж: "Монцамэ" агентлаг