Улаанбаатар зорчигч тээврийн төв буудлын нүхэн гарцыг шинэчилж, урсдаг замтай болгосон нээлтийг өчигдөр /2024.12.19/ хийв. Уг нээлтэд Улаанбаатар төмөр зам ХНН-ийн захирал Х.Хэрлэн тэргүүтэй бүхий л дарга нар нь оролцон тууз хайчилж, нэлээн сурталчилгааны ажлыг хийсэн байна. 

Уг үйл явдлыг харсан олон нийт "Олон улсад хурдны галт тэрэгний нээлт хийж байхад хэдүүлээ урсдаг шатны нээлт хийж, тууз хайчилж  байна. Захын дэлгүүрт байх урсдаг шатнаас хамгийн нарийныг нь суурилуулснаа "Дэлхийн жишигт хүрсэн урсдаг шаттай боллоо" гэлцээд зогсохгүй уг замын анхны зорчигч нь Улаанбаатар төмөр замын дарга Х.Хэрлэн болжээ" хэмээн шүүмжилж, шоглож байна.  Энэ талаар тус байгууллагаас мэдээлэхдээ "Орчин үеийн үйлчилгээний жишигт нийцсэн уг ажлыг УБТЗ өөрийн хөрөнгө оруулалтаар хийж ашиглалтад оруулж байгаа бөгөөд олон жил алдагдалтай явж ирсэн тус нийгэмлэгийн тээврийн тарифыг индексжүүлж, алдагдлыг бууруулсны үр дүнд үйлчилгээнийхээ чанарыг сайжруулах санхүүгийн боломж эхнээсээ бий болж байгаагийн бодит илрэл нь энэ юм" гэж тайлбарлажээ. Ташрамд дурдахад, манай улсын төмөр замд ашиглаж буй нь вагон нь социализмын үед үйлдвэрлэгдсэн бөгөөд хурд, хүчин чадал, үзүүлэлт, тав тухтай байдал гээд бүхий л талаараа дэлхийн жишгээс хоцрогдсон юм.