Улсын онцгой комиссын ээлжит шуурхай хуралдаан өнөөдөр боллоо.

Хуралдаанаар Монгол Улсын Шадар сайд, УОК-ын дарга С.Амарсайхан өвөлжилт, хаваржилтын бэлтгэл ажлын хүрээнд хийж буй ажлууд, ирэх саруудын цаг агаарын нөхцөл байдлын талаарх мэдээлэл сонсож, үүрэг чиглэл өгсөн байна. Зудын эрсдэлийн үнэлгээгээр Баян-Өлгий, Увс, Ховд, Говь-Алтай, Баянхонгор аймаг их эрсдэлтэй, Архангай, Өвөрхангай, Хөвсгөл, Сүхбаатар, аймгууд дунд эрсдэлтэй гарчээ. Өнөөдрийн байдлаар нийт 17913 өрх, 7329 толгой мал отор нүүдэл хийж байна.

Түүнчлэн Шадар сайд С.Амарсайханы тушаалын дагуу УОК-ын шуурхай бүлэг “Өвөлжилтийн бэлтгэл ажлыг хангах”, “Шинэ хоршоо-Чинээлэг малчин” хөтөлбөрт хамрагдаж, хөрөнгө оруулалтын зээл авсан малчид, хоршоологчидтой уулзаж, зээлийн зарцуулалт хэрэгжилтэд хяналт тавьж ажиллаж байна.

Улсын хэмжээнд нийт 6599 хоршоо шинээр байгуулагдаж, 68500 гаруй малчин хоршоологчдод 551.8  тэрбум төгрөгийн зээл олгосон байна. Шуурхай бүлгүүд энэ сарын 15-ны өдрийн байдлаар 14765 малчин, хоршоологчдод хүрч ажиллажээ.