Улаанбаатар хотын хэмжээнд сайжруулсан шахмал түлш хэрэглэдэг болсноор агаарын бохирдол буураагүй, харин ч хоруу чанар нь нэмэгдэж, хүн амын дундах өвчлөл нэмэгдэн, аюулгүй байдалд заналхийлж буйг эрүүл мэндийн салбарынхан сануулсаар буй. Гэвч Нийслэлийн Засаг даргын агаар орчны бохирдол хариуцсан орлогч дарга А.Амартүвшин “түүхий нүүрс хэрэглэж байсан үеийнхээс агаарын бохирдол өнөөдөр 50-60 хувиар буурсан” гэдэг тайлбар хийгээд байна.

Энэ талаар тэрбээр “Сайжруулсан түлш хэрэглэдэг болсноор түүхий нүүрс хэрэглэж байсан үеийнхээс агаарын бохирдол 50-60 хувиар буурсан.

Нийслэлийн хэмжээнд сайжруулсан түлш үйлдвэрлэдэг гурван үйлдвэр ажиллаж байснаас баруун үйлдвэр нь өнгөрсөн дөрөвдүгээр сараас зогсоосон байдаг. Төвийн үйлдвэр, зүүн үйлдвэр хоёр дээр өдөрт 2000-2500 орчим тонн сайжруулсан түлш үйлдвэрлэж байна. Сайжруулсан түлшнээс өдөр бүр шинжилгээ авдаг. Нийслэлийн агаарын бохирдолтой тэмцэх газар, Химийн төвөөс шинжилгээг авч олон улсын итгэмжлэлтэй шинжилгээний төвүүдэд өгч шинжлүүлдэг. Мидлингийн стандарт, шахмал түлшний стандартын дагуу шинжилгээ аваад явж байгаа. Энэ оны тухайд зүүн бүсийн үйлдвэрээс 170, төвийн бүсийн үйлдвэрээс 80, баруун бүсийн үйлдвэрээс 160 гаруй шинжилгээг авсан байдаг. Тэр бүрт шинжилгээний хариу нь хүчиллэг, хүхэрлэг хий, ялгарах тоосонцор нь 1-2 дахин бага, илчлэг нь 1-2 дахин их байгаа” гэдэг тайлбар хийлээ.