Эрүүл мэндийн яамнаас сургуульд суурилсан эрт илрүүлгийн тогтолцоог бий болгохоор ЕБС-ийн нэгдүгээр ангийн сурагчдын нүд, шүд, зүрхний эмгэгийн эрт илрүүлгийн үзлэгийг өнгөрсөн аравдугаар сард эхлүүлсэн. Эхний ээлжинд нийслэлийн сурагчдыг хамруулж буй үзлэг өнөөдрийн байдлаар 60 хувьтай явж байна.

Амьдралын орчин, агаарын бохирдол, хоол хүнс зэрэг олон төрлийн шалтгаанаас бага насны хүүхдүүдийн дундах өвчлөл нэмэгдсээр байгаа юм.

Шүдний үзлэгт 19933 сурагч хамрагдсанаас 78.5 хувь өвчлөлттэй гарчээ. Тодруулбал, эдгээр хүүхдийн 15644 нь шүдний цооролттой, 4083 нь шүдний гажигтай гэж оношлогдсон бол 17379 нь шүдээ бүрэн угаадаггүй гэж гарчээ. Өөрөөр хэлбэл, дийлэнх хүүхэд шүдээ бүрэн угааж чаддаггүй, энэ төрлийн дадал хэвшил суугаагүйн өвчлөлийн гол шалтгаан болж байгааг эмч нар онцоллоо.

Тэгвэл нүдний үзлэгт орсон 13882 хүүхдийн 2125 нь холын хараа, 949 нь ойрын харааны өөрчлөлттэй. Мөн 1292 хүүхдийн стерео хараа нь тэнцээгүй аж. Тиймээс 2897 хүүхдийг нарийн мэргэжлийн эмчид үзүүлэх шаардлагатайг тогтоожээ.