Шатрын эмэгтэйчүүдийн 2024-2025 оны цуврал гранпри тэмцээн өчигдөр /2024.10.30/ Казахстан улсын Шымкент хотод албан ёсоор эхэллээ. Тус тэмцээн арваннэгдүгээр сарын 9-нийг хүртэл үргэлжлэх бөгөөд нийт 10 шатарчин тойргоор өрсөлдөх юм.

Нийт зургаан цуврал тэмцээний үр дүнгээр гранпри тэмцээний цомын эзнийг тодруулах ба нэг тамирчин гуравт нь оролцох эрхтэй аж.

Монгол Улсаас их мастер, гавьяат тамирчин, Үндэсний шигшээ багийн тамирчин Б.Мөнгөнтуул өрсөлдөх юм. Тэрбээр өмнө нь 2009-2010, 2011-2012 оны цуврал тэмцээнүүдэд оролцож зургаа болон наймдугаар байрт шалгарч байсан туршлагатай тамирчин юм. Энэ жил Б.Мөнгөнтуул FIDE Grand Swiss тэмцээнд дөрөвдүгээр байр эзлэн энэ жилийн гранприд оролцох эрхээ авсан байна.

Тус тэмцээнд өмнө нь 2012-2013 оны цувралд Их мастер, гавьяат тамирчин Т.Батчимэг өрсөлдөж тавдугаар байр эзэлж байжээ.