Монгол Улсын Засгийн газрын 2020-2024 оны үйл ажиллагааны хөтөлбөрт зам, тээврийн салбарын чиглэлээр томоохон суурин газруудыг хилийн боомттой холбох төслүүдийг хэрэгжүүлэх, мөн аялал жуулчлалыг хөгжүүлэх болон эдийн засаг, нийгмийн ач холбогдол бүхий зарим сум, суурин газрууд руу чиглэсэн хатуу хучилттай авто зам барих зорилтууд тусгагдсан. Мөн хатуу хучилттай авто замын сүлжээг өргөтгөх, суурин газруудыг хилийн боомттой үе шаттайгаар холбох зарим төслийн ажлуудыг эхлүүлсэн. Энэ ажлын хүрээнд Улаанбаатар-Чингис хот чиглэлийн авто замаас Жаргалтхаан-Өмнөдэлгэр сум хүртэлх 52,5 км хатуу хучилттай авто замын 25 км авто замын хучилтын ажил дууссан тул тээврийн хэрэгслийн хөдөлгөөнийг нээж, энэ 10 сард багтаан ашиглалтад оруулахаар ажиллаж байна. Энэхүү зам нь Хэнтий аймгийн Жаргалтхаан, Өмнөдэлгэр, Биндэр, Баян-Адарга, Норовлин, Дорнод аймгийн Баян-Уул сумд, Ульхан боомт чиглэлийн авто замын нэг чухал холбоос зам юм. Тус замын бүтээн байгуулалтын ажлыг “Тэгш плант” ХХК гүйцэтгэж байна.