Нийслэлийн Баянзүрх дүүргийн нутаг дэвсгэрт хийгдэж буй замын засвар болон энэ долоо хоногт засварт орох замуудын талаар Нийслэлийн Замын Хөгжлийн Газраас/НЗХГ/ мэдээллээ.

НЗХГ-ын дарга Б.Одбаяр "Улаанхуарангийн 1.5 километр урт, дөрвөн эгнээ бүхий зам засварын ажил 90 гаруй хувьтай үргэлжилж, аравдугаар сарын 7-ны 02:00-03:00 цагийн хооронд замын хөдөлгөөнийг нээнэ.

"Да хүрээ" зах өнөөдөр буюу Даваа гарагт амрах учир Эрдэнэтолгойн уулзвараас "МТ" ШТС-ын уулзвар хүртэлх авто замын ажил эхэлж байна. Тус зам нь 14 метрийн өргөнтэй, дөрвөн эгнээтэй бөгөөд засварын ажлыг аравдугаар сарын 7-8-нд хийж дуусгахаар төлөвлөсөн. Уг замыг засах тухай мэдээллийг аравдугаар сарын 4-нөөс олон нийтэд болон ААН, байгууллагуудад мэдэгдсэн байгаа.

Эрдэнэтолгойн уулзварын замыг засаж дууссаны дараа аравдугаар сарын 8-нд Цагдаагийн гудамжны зам засварын ажил эхэлнэ. Ингэхдээ эхний ээлжид Оргил худалдааны төвөөс Хилчингийн уулзвар хүртэлх 800 метр, дараагийн ээлжид Хилчингийн уулзвараас Офицеруудын тойрог хүртэлх замыг засах юм.

Цаг агаарын нөхцөл байдалтай уялдуулан өдрийн цагаар замын хучилтын ажлыг хийж байгаа.

Өнөөдрийн байдлаар Улаанхуаран, Нарны замд Барс захын уулзвар, Хүннүгийн гудамжны урд талын замыг засаж дуусаж байна. Үргэлжлүүлэн Хүннүгийн гудамжны хойд талын замыг засна.

Нисэхийн тойргоос Архивын Ерөнхий Газар хүртэлх зам засварын ажил дуусаж, хөдөлгөөнийг нээхэд бэлэн боллоо.

Энэ долоо хоногт зам засварын ажил үргэлжлэх тул зам хаах тухай мэдээллийг 72 цагийн өмнө мэдэгдэж байгааг иргэд хүлээн авч, ажлаа зохицуулж байхыг зөвлөе" гэв.