Хан-Уул дүүргийн 3 дугаар хороо, Механик инженерийн сургуулийн хойно ус ихээр тогтдог байршилд авто замын борооны ус зайлуулах 170 метр шугам хоолойг угсарчээ. Харин нөхөн сэргээлтийн ажил буюу асфальтыг энэ сарын 27-нд дуусгахаар төлөвлөжээ.

Энэ талаар Геодези, усны барилга, байгууламжийн газар ОНӨААТҮГ-ын дарга Б.Бямбасайхан “Механик инженерийн сургуулийн хойно ус ихээр тогтдог байршилд ус зайлуулах шугам хоолойг ажлын таван хоногт угсарч дууслаа. 170 метр шугам хоолойг есөн шүүрт худагтайгаар Дунд гол руу гаргалгааг гаргаж угсарсан.

2024 онд нийт 15 байршилд авто замын борооны ус зайлуулах шугам угсралтын ажлыг гүйцэтгэж байна. Өмнөх жилүүдэд ийм олон байршилд ажиллаж байгаагүй. Жилд 7, 8 байршилд л ажиллаж байсан. Тэгвэл энэ жил нийт 15 байршил буюу 5.1 км газрыг ус зайлуулах шугам сүлжээтэй болголоо.

Нэмэлтээр хамгийн их ус тогтдог байршлын нэг Нарны гүүрний урд 1,260 метр шугам, Энхтайвны гүүрний доод талд 1,200 метр шугам, Вокзал орчимд 2.4 км урт шугам хийхээр төлөвлөж, улаан шугам тавьж, бэлтгэл ажил хангасан. Энэ намар хүйтэртэл ажлыг явуулаад, хавар эрт ажлаа үргэлжлүүлж, нийслэл хотыг зун борооны усгүй байлгахаар төлөвлөж ажиллаж байна” гэв.

Борооны ус зайлуулах шугам угсрах 15 дахь байршил нь Энхтайвны гүүрний доод талын “Наран” хотхон. Тус байршилд шугам угсрахаар материал татсан, замын ачааллаас шалтгаалж ажлыг өнөөдөр шөнө эхлэхээр төлөвлөжээ.