Ази тивийг нэрвэсэн энэ оны хамгийн хүчтэй далайн хар салхи гэгдэж буй Яги өнгөрсөн Бямба гарагт Вьетнам улсын хойд хэсгийг дайрахдаа үер ус, хөрсний гулсалтын томоохон гамшиг учруулсан юм.

Үүний улмаас 127 хүн амиа алдаж, 54 хүн сураггүй болсныг Вьетнамын эрх баригчид өчигдөр мэдээлжээ. Бас 752 хүн бэртэж, гэмтсэн байна.

Байгалийн гамшиг одоо ч үргэлжилж, үерт автсан гэрийнхээ дээвэр дээр хашигдсан олон мянган хүн эрх баригчдаас аврал эрж буйг сошиал сүлжээнд тарсан дүрс бичлэгүүд харуулж байгаа.

Вьетнамын сүүлийн 30 жилийн түүхэнд ийм хүчтэй далайн хар салхи бүртгэгдэж байгаагүй юм. Гамшгийн улмаас тус улсын хойд хэсэгт 1.5 сая хүн цахилгаан хангамжгүй болжээ.

Даваа гарагт Фу То мужийн нутагт оршдог Фон Чау гүүр үерийн усанд нурахад дээр нь зорчиж байсан хэд хэдэн автомашин голд унасан юм.

Вьетнамд газардах үедээ 150 км/цаг хүрч байсан хар салхины хурд одоо саарсан бөгөөд баруун зүгт шилжиж, хөрш Лаос улсын нутагт хүрээд байгаа.

Вьетнамын засгийн газар хойд бүсийнхээ 18 мужийн 401 засаг захиргааны нэгжид үер ус, хөрсний гулсалтын сэрэмжлүүлэг гаргаад байна.

Яги хар салхи Вьетнамд хүрэхээсээ өмнө Хятадын өмнөд хэсэг, Филиппиний хойд нутгийг дайрахдаа нийт 24 хүний амийг хөнөөсөн юм.

Уур амьсгалын өөрчлөлт далайн хар салхины эрчийг нэмэгдүүлж, давтамжийг ойртуулсан гэж судлаачид тайлбарлаж байна.

Эх сурвалж: BBC