Хууль зүйн байнгын хорооны өнөөдрийн хуралдаанаар Засгийн газрын 2024-2028 оны үйл ажиллагааны хөтөлбөрийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, хариулт авав.

УИХ-ын гишүүн П.Сайнзориг “Орон сууцны барилгыг улсын комисс хүлээж авдаг асуудлыг зургийн компанид нь нэг мөр хариуцуулдаг болъё. Зургийн компани нь тухайн барилгаа толгойгоороо хариуцдаг байх ёстой. Чанар муутай барилга ашиглалтад оруулах нь гэмт хэрэг байтал нэг ч хүн шалгагддаггүй. Хүний өмчийн эрх асар их зөрчигддөг боллоо.

Барилгын компаниуд барьж буй барилгынхаа урд цэцэрлэгт хүрээлэнтэй байна гэж захиалга авчхаад байраа борлуулсны дараа төрийн байгууллагуудтай хуйвалдаад  нэмээд барилга барьчихдаг. Энэ бол залилан. Манай бүх барилгын компаниуд ийм байдлаар залилан хийдэг. Энэ асуудлыг анхаараач гэж Засгийн газраас хүсэж байна.

Чанар муутай барилга ашиглалтад оруулаад хариуцлага хүлээсэн хүн Монголд нэг ч байхгүй. Тиймээр барилгын компаниудыг хариуцлагатай болмоор байна” гэв.